Աշխարհի առաջնության ընտրական փուլի առաջին տուրում ֆուտբոլի Հայաստանի ազգային հավաքականը մարտի 25-ին հյուրընկալվի Լիխտենշտեյին։ Ընդամենը երեք օր անց, մեր հավաքականը Երևանում կմրցի Իսլանդիայի հետ։ Կկարողանա՞ն արդյոք ֆուտբոլասերները ներկա կգտնվել այդ հանդիպմանը։ Կորոնավիրուսի համավարակի հետևանքով Եվրոպայում ֆուտբոլային հանդիպումների մեծ մասը տեղի է ունենում առանց հանդիսականների։ Նշենք, որ երկրպագուներին մարզադաշտ թույլատրել չթույլատրելու հարցը որոշում է տվյալ երկրի ֆուտբոլի ֆեդերացիան ինչպես նաև կառավարությունը։ Միջազգային մրցաշարերում ֆուտբոլասերների մարզադաշտ այցելելու խնդրում ՈւԵՖԱ-ն կարծես թե ձեռնպահ է մնում։ Օրինակ, փետրվարի 18-ին տեղի ունեցած Եվրոպա լիգայի խաղարկության «Կրասնոդար»-«Զագրեբ» հանդիպումը տեղի ունեցավ հազարավոր երկրպագուների ներկայությամբ։ Չմոռանանք նաև անցյալ տարվա հոկտեմբերին տեղի ունեցած Ազգերի լիգայի խաղարկության Էստոնիա-Հայաստան հանդիպումը։
Էստոնիայի ֆուտբոլի ֆեդերացիան թույլատրել էր մարզադաշտի 30 տոկոսի չափավ ֆուտբոլասերների ներկայություն։ Մինչդեռ մեր ենթախմբի մյուս բոլոր հանդիպումները տեղի ունեցան առանց երկրպագուների։ Նշենք, որ ՀՖՖ-ն վերջերս որոշում կայացրեց Հայաստանի առաջնության հանդիպումներին երկրպագուների այցելության սահմանափակումը վերացնելու մասին։ Միանգամայն տրամաբանական կլինի, որ Իսլանդիայի հետ երևանյան հանդիպմանը ֆուտբոլասերները ևս հնարավորություն ունենան այցելելու «Հանրապետական» մարզադաշտ։ Այս հարցում կարևոր է նաև կառավարության դիրքորոշումը։ Վերջին օրերին Երևանում տեղի են ունենում քաղաքական ակցիաներ որոնց մասնակցում են տասնյակ հազարավոր քաղաքացիներ։ Անընդունելի և անհասկանալի կլինի, եթե առաջիկա հանդիպմանը մարզադաշտ այցելելու արգելք սահմանվի։ «Հանրապետական» մարզադաշտը տեղավորում է մոտ 15 հազար երկրպագու։ Վերջին անգամ ֆուտբոլասերը Հայաստանի ազգային հավաքականի հանդիպմանը մարզադաշտից հետևել է 2019 թվականի նոյեմբերի 15-ին։ Այդ օր մեր հավաքականը Եվրոպայի առաջնության ընտրական փուլի շրջանակներում մրցեց Հունաստանի հետ և պարտվեց 0։1 հաշվով։
Այդ հանդիպումից 3 օր անց մեր հավաքականը կրեց պատմության մեջ ամենախայտառակ պարտությունը՝ Պալերմոյում 9։1 հաշվով զիջելով Իտալիային։ Այդ հանդիպումից հետո սակայն մեր հավաքականում իրավիճակ է փոխվել և հավանականությունը մեծ է, որ Իսլանդիայի դեմ մրցավեճում «Հանրապետականի» տրիբունաները լեփ-լեցուն կլինեն։ Վերջին պաշտոնական մրցաշարում մեր հավաքականը հաղթող դարձավ Ազգերի լիգայի C դիվիզիոնում՝ իրավունք ստանալով խաղալու արդեն B դիվիզիոնում։ Ընդամենը կես տարի առաջ դժվար էր հավատալ, որ ֆուտբոլի Հայաստանի հավաքականը կարող է նման արդյունք գրանցել։ Հոկտեմբերին՝ Վրաստանի և Էստոնիայի դեմ մրցավեճերում, մերոնք ցույց տվեցին դժգույն և թույլ ֆուտբոլ։ Ցույց տվեցին այն ֆուտբոլը, որ սովորաբար ցուցադրում էին։ Բարձրակարգ գլխավոր մարզիչ Խոակին Կապառոսը հավաքականը դրեց ռելսերի վրա, և առաջխաղացումն իրեն երկար սպասեցնել չտվեց։ Վրաստանի և Հյուսիսային Մակեդոնիայի դեմ վերջին հանդիպումներում մեր հավաքականը խաղաց տակտիկապես գրագետ և որակյալ ֆուտբոլ։
Ընդ որում, վերջին հաղթանակները մերոնք տոնեցին առանց առաջատար մի քանի ֆուտբոլիստների։ Մեր հավաքականի գլխավոր մարզիչը վերջնականապես կոտրեց այն կարծրատիպը, թե ներկայիս կադրերով հնարավոր չէ խաղալ և արդյունքի հասնել։ Կապառոսը ապացուցեց, որ բարձրակարգ և բանիմաց մասնագետը կարող է եղանակ փոխել և առաջ տանել թիմին։Կորոնավիրուսի համավարակի հետևանքով զրկված լինելով ընկերական հանդիպումներ անցկացնելու հնարավորությունից՝ Կապառոսը Ազգերի լիգայի խաղարկությունը լավագույնս օգտագործեց ըստ էության նոր հավաքական կազմավորելու համար։ Կապառոսը լուծեց առաջին և կարևոր խնդիրը։ Հիմա Հայաստանն ունի հավաքական, որն ի զորու է պայքարելու։ Եկել է առաջ շարժվելու ժամանակը։
Վերադառնալով Իսլանդիայի հետ կայանալիք հանդիպմանը նշենք, որ մարտի 25-ին մերոնք մրցելու են խմբի ետնապահ Լիխտենշտեյնի հետ և հավանականությունը մեծ է, որ Հայաստանի հավաքականը վստահ հաղթանակ կտանի։ Այս հաղթանակը ևս կարող է շարժառիթ դառնալ, որ երեք օր անց ֆուտբոլին և հավաքականի կարոտած մեծ թվով ֆուտբոլասերներ ցանկանան այցելելու «Հանրապետական»։