Ապրիլին «Աերոֆլոտ»-ի կարճ չվերթների ուղևորները կկարողանան օգտվել վճարովի ինտերնետից, հաղորդում է «Իզվեստիա»-ն՝ հղում անելով ավիաընկերության մամուլի ծառայության հայտարարությանը: Utair և «Ուրալյան ավիաուղիներ» ընկերությունները հաղորդել են, որ նույնպես աշխատում են այդ ուղղությամբ:
«Աերոֆլոտը» տեղեկացրել է, որ այս տարի իր Airbus A320 ինքնաթիռներից 16-ը կվերազինեն ինտերնետ հասանելիությամբ: Սակայն, ընկերությունը չի նախատեսում վերազինել իր պարկում եղած բոլոր 105 ինքնաթիռները, քանի որ նոր Airbus А320neo և А350 օդանավերն արդեն հագեցած կլինեն ինտերնետ հասանելիության համակարգերով:
Ծառայության համար ուղևորը պետք է վճարի 5-25 դոլար, ասել է «Իզվեստիա»-ի «Աերոֆլոտ» խմբի աղբյուրը: Ավիաընկերության մամուլի ծառայությունից հայտնել են, որ ինքնաթիռում տվյալների փոխանցման միջին արագությունը կկազմի 10 Մբ/վ: