ԱՄՆ պարենի և դեղորայքի որակի հարցերով վարչությունը (FDA) որոշել է հավանության արժանացնել Johnson & Johnson ընկերության կողմից մշակված կորոնավիրուսի դեմ պատվաստանյութը՝ արտակարգ օգտագործման համար: Այս մասին տեղեկացնում է կարգավորողի կայքը:
Սա երրորդ պատվաստանյութն է, որը հավանության է արժանացել ԱՄՆ-ում օգտագործման համար: Ավելի վաղ երկրում թույլ էին տվել օգտագործել Pfizer/BioNTech և Moderna ընկերությունների դեղերը:
Պատվաստանյութի արտադրությամբ զբաղվում է Janssen Pharmaceutica ընկերությունը (պատկանում է Johnson & Johnson կոնցեռնին): Այս պատվաստանյութը համարվում է վեկտորային, ինչպես ռուսական «Sputnik V»-ն, ինչպես նաև անգլո-շվեդական AstraZeneca-ն: Ի տարբերություն Ամերիկայի Միացյալ Նահանգներում հավանության արժանացած այլ պատվաստանյութերի՝ սա պահանջում է միայն մեկ ներարկում, ոչ թե երկու: