Թարմ քամած հյութերը, արագ պատրաստվող շիլաները, փաթիլները և ջեմով տոստը բացասաբար են ազդում առողջության վրա նախաճաշին պարբերաբար օգտագործելու դեպքում: Այս մասին նախազգուշացրել է դիետոլոգ Ելենա Սոլոմատինան «Խոսում է Մոսկվան» ռադիոկայանին տված հարցազրույցում:
Այսպես. հատկապես վտանգավոր է դատարկ ստամոքսին խմել մրգային ըմպելիքներ՝ օրգանական թթուների և շաքարի մեծ պարունակության պատճառով: «Եթե միրգը քաղցր է, այն ունի շատ շաքար, ուստի արյան մեջ գլյուկոզայի մակարդակը արագորեն բարձրանում է, հատկապես գիշերվանից հետո, երբ առանց այն էլ սկզբունքորեն ունենք կորուստ, մեր օրգանիզմը արդեն վերամշակել է գլյուկոզան, և դրանից հետո մենք սկսում ենք խմել, և անմիջապես տեղի է ունենում գլյուկոզայի մակարդակի բարձրացում, ինսուլինի արտանետում»,- բացատրել է նա: Ցիտրուսային հյութերի դեպքում միջուկը կօգնի զսպել շաքարի կլանումը, սակայն թթուները կարող են վնասել ատամի էմալը և ստամոքսի լորձաթաղանթը:
Արագ պատրաստվող շիլաները, որոնք պարունակում են քիչ սննդային մանրաթելեր, ունեն բարձր գլիկեմիկ ինդեքս: «Շիլան ածխաջուր պարունակող մթերք է, և արյան մեջ շաքարի մակարդակը ևս բարձրանում է (…): Դա հղի է նրանով, որ մենք շատ արագ ցանկանում ենք ուտել, իսկ աշխատանքային առաջին ժամերին մենք կսկսենք տառապել ու քնել՝ քաղցի զգացում ունենալով»,- ասել է դիետոլոգը:
Օրգանիզմում համանման պրոցեսներ են առաջացնում նաև փաթիլները: Սոլոմատինայի խոսքով՝ նախաճաշին թույլատրելի է ուտել միայն ամբողջական հացահատիկային փաթիլներ: «Եթե մենք ավելացնենք նաև ինչ-որ ջեմով տոստ, դա կմեծացնի ենթաստամոքսային գեղձի ածխաջրային բեռը»,- ավելացրել է բժիշկը:
Նա ամփոփել է՝ ասելով, որ մի քանի անգամ այս կերակուրներն ուտելը առողջությանը չի հասցնի զգալի վնաս, սակայն նախաճաշին այս մթերքների մշտական օգտագործումը վտանգավոր է օրգանիզմի համար: Այս դեպքում բացասական ազդեցությունը կախված կլինի տարիքից և կենսաակերպից: