ԳՇ հայտարարությունը պարունակում է հանցակազմի տարրեր, և արդեն իսկ պետք է գործ հարուցված լիներ: Այս մասին «Առաջին լատվական»-ի հետ զրույցում նշեց փաստաբան Լուսինե Հակոբյանը՝ անդրադառնալով ԳՇ հայտարարությանը, որով պահանջում են վարչապետի և կառավարության հրաժարականը:
«Դա չպետք է դիտարկել որպես մեկուսի արարք, այլ պետք է դիտարկել նոյեմբերի 9-ին հաջորդած զարգացումների լույսի ներքո, երբ հայտնի շրջանակները փորձում էին բոլոր միջոցներով, այդ թվում նաև հակասահմանադրական, զավթել իշխանությունը, և դեռևս պատերազմի ժամանակ փորձ էին անում բանակին ներքաշել այդ ամենի մեջ, հիշենք Վազգեն Մանուկյանի հայտնի կոչը:
ԳՇ պետը բավական երկար ժամանակ դիմադրություն ցույց տվեց, և կարելի է ասել, որ ինչ-ինչ ճնշումների տակ տեղի տվեց»,- նշեց փաստաբանը:
Նրա խոսքով՝ ԳՇ հայտարարությունը խախտում է Սահմանադրության 14-րդ հոդվածը, որով Զինված ուժերից պահանջվում է քաղաքական չեզոքություն, և ամրագրվում է, որ ԶՈՒ-ն գտնվում է քաղաքացիական վերահսկողության տակ, ինչը ժողովրդավարության անկյունաքարային սկզբունք է:
Հակոբյանի կարծիքով՝ հայտարարության ներքո ստորագրած մի խումբ զինվորականները պետք է խիստ պատասխանատվության ենթարկվեն, քանի որ դա շատ վատ նախադեպ է ստեղծում մեր երկրում:
Անդրադառնալով դիտարկմանը, որ գեներալներ Սեյրան Օհանյանը և Յուրի Խաչատուրովը միացել են ընդդիմադիր շարժմանը և սատարում են ԳՇ հայտարարությանը՝ Հակոբյանն ընդգծեց. «Նրանք դրանով իսկ ապացուցում են, որ բանակը ամեն ձևով ներքաշել էին Մարտի 1-ի իրադարձությունների մեջ: Եթե իրենք որպես սկզբունք չեն դիտարկում այն, որ բանակը չպետք է խառնվի քաղաքական հարցերին և պետք է մնա քաղաքացիական վերահսկողության ներքո, ապա դրանով իսկ ապացուցում են իրենց մեղքը Մարտի 1-ի արյունալի իրադարձություններում բանակը ներքաշելու մեջ, որովհետև դա իրենց համար, ըստ էության, ընդունելի երևույթ է»:
Մանրամասն՝ տեսանյութում:
