«Եթե Հայաստանում սկսվեն քաղաքացիական բախումներ, քաղաքացիական պատերազմ, Ռուսաստանը չի կարող փակ աչքերով նստել»,- «Առաջին լրատվական»-ի հետ զրույցում նման տեսակետ հայտնեց փորձագետ Արբակ Խաչատրյանը։
Մեր հարցին՝ արդյո՞ք Ռուսաստանն է հրահրել ներքին այս լարվածությունը Հայաստանում, Խաչատրյանը պատասխանեց. «Եթե դուք ձեր տան մեջ ձեր ընտանիքի անդամի հետ չեք կռվում, հարևանը չի միջամտում։ Ռուսաստանին պետք չէ Հայաստանում քաոս։ Այս կառավարությունն ամեն ինչ արեց ռուսական ազդեցությունը մեծացնելու համար։ Հայաստանում է ռուսական ռազմաբազան, Ղարաբաղում՝ ռուս խաղաղապահները։ Եթե իրավիճակը թեժանա այն աստիճանի, որ սկսվեն քաղաքացիական բախումներ՝ Ռուսաստանը չի կարող չմիջամտել։ Թեպետ նորից եմ կրկնում՝ Ռուսաստանին ձեռնտու չէ քաոսային իրավիճակ Հայաստանում։ Սա ընդհանրապես կարող է դառնալ տարածաշրջանային խնդիր՝ ոչ միայն Հայաստանի։ Ամբողջ աշխարհում այսօր առանց այն էլ խնդիրները շատ են՝ Սիրիա, Դոնբաս, այս մի քանի քառակուսի կիլոմետր տարածքն էլ այդ ամենի հետ մեկտեղ աշխարհի ուշադրության կենտրոնում է»։
Դեռ մեր նախկին հարցազրույցներում Արբակ Խաչատրյանը կանխատեսել էր այսպիսի վտանգը։ Այսօր մեր զրուցակիցը գտնում է, որ իրավիճակի հանգուցալուծումը շատ բարդ է, սակայն հաղթահարելի. «Միջազգային ոչ մի նորմ այսօր չի աշխատում։ Ես գտնում եմ, որ պետք է ստեղծվի ամբողջ հայության արդարության խորհուրդ, ուրիշ ոչ մի ինստիտուտ չպետք է աշխատի»։