Հանրապետության հրապարակում այսօր տեղի ունեցավ Նիկոլ Փաշինյանի բազմահազարանոց հանրահավաքը, որի ավարտին քաղաքացիները երթ իրականացրին: Փաշինյանն իր աջակիցներին կոչ էր արել գալ հրապարակ այն բանից հետո, երբ ԶՈՒ Գլխավոր շտաբը հայտարարություն էր տարածել, որով պահանջվում էր կառավարության և վարչապետի հրաժարականը:
Թեմայի շուրջ «Առաջին լրատվական»-ի հետ զրույցում փաստաբան Տիգրան Եգորյանն ընդգծեց, որ ԳՇ հայտարարությունը ակնհայտորեն հակասում է Սահմանադրությանը, հակասում է նաև Զինված ուժերին և այդ փաստաթուղթը ստորագրած պաշտոնատար անձանց լիազորություններին: «Ավելին՝ այն պարունակում է Քրեական օրենսգրքով սահմանված հանցատարրեր: ԳՇ հայտարարությունը պետք է քննության առարկա դառնա»,- նշեց փաստաբանը:
«Հստակ է, որ այսօր ժողովրդավարության և ինքնիշխանության դեմ ներքին և արտաքին պայքար է մղվում: Այն չի դադարել, գործել է թաքնված կամ գործել է փաթեթավորված՝ որպես քաղաքական գործընթացներ, որպես բողոքի գործողություններ, կամ որպես հայտ՝ վերադառնալու քաղաքականություն: Դա վերաբերում է ոչ միայն «17+»-ին: Եվ արտաքին պայքարն էլ վերջերս դրսևորվեց Հայաստանի դեմ պատերազմական դրսևորումներով:
96թ. սկսած՝ այս պայքարն ընթանում է… Մեր երկրի բոլոր ղեկավարները հայեր են եղել, բայց անհասկանալիորեն բոլոր պրոցեսները ի վնաս ժողովրդավարության և ի վնաս ինքնիշխանության են եղել: 2018-ին հեղափոխական գործընթացների արդյունքում ժողովուրդը զգաց իր իշխանության համը:
Արտաքին ուժերի հետ հանցավոր համագործակցության մեջ գտնվող ուժերը հույս ունեին, որ այս իշխանությունները շատ կարճ կյանք են ունենալու, և իրենք իշխանությունը հետ կվերցնեն, դա ձախողվեց, և այսօր տեսնում ենք իշխանության յուրացման նպատակի համար արդեն բացահայտ պայքար, որը դեմ է ժողովրդին, ժողովրդավարությանը և ինքնիշխանությանը»,- նշեց փաստաբանը:
Մանրամասն՝ տեսանյութում:
