«Աստանայում կայանալիք ԵԱՀԿ դեկտեմբերյան գագաթնաժողովի ժամանակ, ամենայն հավանականությամբ, կվերահաստատվի ԼՂ հակամարտության կարգավորման ձևաչափը»,- լրագրողների հետ հանդիպման ժամանակ նկատեց քաղաքագետ, ԱՊՀ երկրների ինստիտուտի հայաստանյան մասնաճյուղի տնօրեն Ալեքսանդր Մարկարովը: Նրա կանխատեսմամբ, գագաթնաժողովում ԼՂ խնդրի կարգավորման վերաբերյալ որևէ կոնկրետ փաստաթուղթ չի ստորագրվի, բայց կամրապնդվեն խնդրի կարգավորմանն ուղված բանակցային ջանքերը:
Մարկարովի բանախոս, «Սիվիլիթաս» կենտրոնի փորձագետ Թաթուլ Հակոբյանն էլ ասաց, թե գագաթնաժողովներն այն տեղը չեն, որտեղ որոշումներ են ընդունվում, բայց ուղենշային իմաստով դրանք շատ կարևոր են: Փորձագետի խոսքով, եթե Աստանայում փորձ արվի փաստաթղթով ամրագրել երկրների տարածքային ամբողջականության սկզբունքը, Հայաստանը ճիշտ կանի, եթե կիրառի վետոյի իր իրավունքը: Հակոբյանը վստահ է, Հայաստանն ունի ռեսուրս՝ վետոյի իր իրավունքը կիրառելու համար, «սակայն ամեն մի վետո ունի իր գինը, որի համար մենք վճարում ենք հետագայում»: Այդուամենայնիվ, բանախոսները խուսափեցին նշել, թե այդ որոնք են Հայաստանի ռեսուրսները, որոնց վրա հենվելով վերջինս կարող է կիրառել իր վետոյի իրավունքը: Անդրադառնալով Սերժ Սարգսյանի Լիսաբոն չգնալուն, Թաթուլ Հակոբյանը նշեց, որ Հայաստանը պետք է մասնակցի բոլոր ֆորումներին և պետք է մինչև վերջ պայքարի բանակցությունների սեղանի շուրջ:
Ալեքսանդր Մարկարովն էլ նկատեց, որ կոռեկտ չէ հայտարարել, թե Հայաստանը չի մասնակցել ՆԱՏՕ-ի գագաթնաժողովին` հիշեցնելով ՀՀ պաշտպանության և արտաքին գործերի նախարարների մասնակցության մասին. «Մի քանի օրից էլ Աստանայում ԵԱՀԿ երկար սպասված գագաթաժողովին էլ չի մասնակցելու ԱՄՆ նախագահը: Արդյո՞ք սա նշանակում է, որ ԵԱՀԿ-ի ֆորմատը ԱՄՆ-ի համար երկրորդական է, այնպես որ ասել «չի մասնակցել», այդքան էլ կոռեկտ չէ, քանի որ մասնակցել է, ավելին` ցուցաբերել է սեփական դիրքորոշումն այն իրավիճակին, որ ստեղծվել է այդ գագաթաժողովի ժամանակ»:
Ըստ Ա.Մարկարովի` նախագահը նաև ցույց է տվել, որ Հայաստանը պատրաստ է վարել կառուցողական քաղաքականությունը տարբեր ֆորմատներով` ներառյալ ՆԱՏՕ-ի հետ համագործակցությունը տարբեր ծրագրերի շրջանակներում: Քաղաքագետի համոզմամբ` Սերժ Սարգսյանի այս քայլը կարող է նաև հանդես գալ իբրև նախազգուշացնող գործոն Աստանայում սպասվելիք ԵԱՀԿ գագաթաժողովից առաջ. «Այսինքն` մենք մի անգամ դա արել ենք և բացի վետոյի իրավունքից, որ Հայաստանը կարող է կիրառել ԵԱՀԿ գագաթաժողովում, մենք կարող ենք անել նաև հետևյալ քալը»: