2018-ի հեղափոխությունից հետո թեև մի շարք համայնքներում և քաղաքներում համայնքի ղեկավարի և քաղաքապետերի փոփոխություն տեղի ունեցավ, բայց անփոփոխ մնացին հանրապետության երկու կարևոր քաղաքների՝ Գյումրիի և Վանաձորի քաղաքապետները։ 2016-ին այդ երկու քաղաքներում ընտրությունները, նոր սահմանադրական փոփոխությունների և ԸՕ-ի համաձայն, տեղի ունեցան, ըստ որոնց՝ քաղաքապետն ընտրվում էր ոչ թե ուղղակի ընտրությամբ, այլ ավագանու կողմից, այնպես, ինչպես Երևանում։ Արդյունքում ՀՀԿ-ի կողմից առաջադրված Մամիկոն Ասլանյանն ընտրվեց Վանաձորի քաղաքապետ, իսկ Գյումրիում Բալասանյան դաշինքով քաղաքապետ ընտրվեց Սամվել Բալասանյանը։
2021-ի սեպտեմբերին Վանաձորում և Գյումրիում ևս ավագանու ընտրություններ են։ Իշխանությունները մինչ այս պահը չունեն դեռևս թեկնածուներ այդ քաղաքներում։ ԱԺ «Իմ քայլը» խմբակցության գյումրեցի պատգամավոր, Շիրակի նախկին մարզպետ Կարեն Սարուխանյանը «Առաջին լրատվական»-ի հետ զրույցում նշեց, որ Գյումրիում դեռ չունեն որոշում, թե ում կառաջադրեն։ «Այս պահին Գյումրու տարածքային կառույցն ենք ձևավորվում, հիմա դիմումատուների քննարկումներ են, և դիմումներին ենք պատասխանում, որի արդյունքում կձևավորի տարածքային կառույց»,-ասաց նա՝ հավելելով, որ կառույցի ձևավորումից հետո կանցնեն թեկնածուների որոշմանը։ Նա նշեց, որ, որպես իշխանության ներկայացուցիչ՝ գոհ է Սամվել Բալասանյան քաղաքապետի աշխատանքից։ Հարցին՝ հնարավո՞ր է արդյոք Բալասանյանը դառնա իշխանության թեկնածու, պատգամավորը նշեց, որ նրան առաջադրելու մասով որևէ քննարկում չի եղել։
Վանաձորի քաղաքապետ Մամիկոն Ասլանյանը «Առաջին լրատվական»-ի հետ զրույցում նշեց, որ մտադիր է նորից մասնակցել ընտրություններին։ Հնարավո՞ր է արդյոք Մամիկոն Ասլանյանը իշխանության թեկնածուն լինի, նշեց․ «Ֆորմատը և մնացած բոլոր մանրամասները այս պահին չեմ կարող ասել, ժամանակը գա, արդեն ես կհայտարարեմ ֆորմատի մասին։ Միայն կարող ասել, որ, ամենայն հավանականությամբ, մասնակցելու եմ ընտրություններին»։ Նա նաև հավելեց, որ նման որոշման է հանգել և՛ վանաձորցիների՝ իր նկատմամբ ունեցած վերաբերմունքից, և՛ իր՝ քաղաքի և վանաձորցիների նկատմամբ վերաբերմունքից։