«Սասնա ծռեր» խմբի անդամների նկատմամբ կարող է կիրառվել համաներում։ Այս մասին այսօր պատժի վերջնական վճիռները հրապարակելուց հետո ասաց դատավորը։
Որոշվեց այս փուլում խմբի անդամների խափանման միջոցները չփոխել՝ նախքան դատավճիռների օրինական ուժի մեջ մտնելը։ Դատավորն ասաց, որ 2018 թվականին ընդունված համաներման ակտը կիրառելի է նաև այս գործով անցնող ամբաստանյալների նկատմամբ՝ բացառությամբ այն անձանց, ովքեր մեղադրվում են սպանության մեջ։
«Եվ քանի որ տուժողները առարկեցին, դատարանը չկարողացավ կիրառել համաներման ակտը, բայց հետագա դատավարական փուլերում՝ Վերաքննիչ կամ Վճռաբեկ դատարաններում մինչև այդ գործով դատական ակտը օրինական ուժի մեջ մտնելը, եթե տուժողները փոխեն իրենց դիրքորոշումները, ապա ամբաստանյալների նկատմամբ համաներման ակտը կիրառելի է»,- ասաց դատավորը։
Նա նաև ասաց, որ դատարանը ապացուցված չհամարեց Արմեն Բիլյանին մեղսագրված սպանության մեղադրանքը։ Հետևաբար, այդ մեղադրանքով դատական ակտ չի կայացվել։ Նշենք, որ Արմեն Բիլյանին նաև մեղադրանք էր առաջադրվել ոստիկան Գագիկ Մկրտչյանի սպանության համար։