«17+»-ի գործունեությունը, կոպիտ ու գավառական անհնազանդության ակցիաները աշխատում են ՀՀ քաղաքական կյանքի զարգացման օգտին: «Առաջին լրատվական»-ի հետ զրույցում այս կարծիքը հայտնեց Գերագույն խորհրդի նախկին պատգամավոր Ազատ Արշակյանը:
«Հասարակությունը կանգնել է փաստի առաջ՝ կա՛մ հեղափոխությունը ձախողած իշխանություն, կա՛մ վրիժառուներ՝ քրեաօլիգարխիկ համակարգի ներկայացուցիչներ: Քրեաօլիգարխիկ համակարգը գիտի, որ իշխանության չի գալու, բայց այս իշխանությանը վնաս են տալիս, խոցում են, ճոճում են իշխանության նավակը: Ես համաձայն եմ, որ նրանք ճոճեն իշխանության նավակը, որպեսզի վերջապես իշխանությունը վտանգի զգացում ունենա, և հասկանա, որ այսօրվա «17+»-ը չի հաղթելու, բայց ինքն էլ չի մնալու իշխանության: Թող մրցակցային պայմաններ ստեղծի և քրեաօլիգարխիկ համակարգը հեռացնի ասպարեզից»,- նշեց Արշակյանը:
«Արդար Հայաստան» կուսակցության փոխնախագահ Դավիթ Կարապետյանը կարծիք հայտնեց, որ ընդդիմությունը հասարակությանը փորձում է ոտքի հանել, բայց առհասարակ օրակարգ չունի: «Հասկանալի չէ, ինչ են ուզում՝ մարդկանց հավաքելով հրապարակում: Խոսում են սպառնալիքի լեզվով, բայց այդ լեզվով հաջողության չեն հասնի»: Կարապետյանի խոսքով՝ «17+»-ը օգտագործում է հասարակությանը և փորձում է քաղաքական դիվիդենտներ շահել:
«Թավիշն ապահովող ինստիտուտը բացակայում է՝ չկա մեկը, որ միջնորդ լինի սպառնացողների և իշխանության համար: Ընդդիմությունը «կարկանդակը կիսելու»՝ համագործակցության առաջարկ է անում Փաշինյանին: Բոլոր օլիգարխները չէ, որ հալածվում են, բոլոր քրեականները չէ, որ բանտում են, և ընդդիմությունն ուզում է պայմանավորվել՝ դո՛ւ էլ մնա, մե՛նք էլ մնանք:
Ընդդիմությունը դաշնակցին, գործընկերոջը լքելու մեծ փորձ ունի, հիշենք «բամփելը». դաշնակցին լքելու դասական օրինակ է ՀՀԿ վարչության նիստը»,- ընդգծեց Ազատ Արշակյանը:
Մանրամասն՝ տեսանյութում:
