«Վազգեն Մանուկյանն ազնձնակա՞ն, թե՞ պետությունը թուլացնելուն ուղղված նպատակներ է հետապնդում, չեմ կարող ասել, բայց այն, որ անկախ նպատակներից՝ այդօրինակ գործելաոճը լրջագույն վտանգներ է պարունակում պետության համար, կասկած չկա: Այն մեթոդաբանությունը, որ ընտրվել է արմատական ընդդիմության կողմից, չի բերելու որևէ ճգնաժամի հաղթահարման: Արմատական տրամաբանությամբ որևէ հաջողության հասնելու դեպքում առաջանալու է հակառակ արմատականություն: Ակնհայտ է, որ այդ մոտեցումներով ընդդիմությունը չունի լայն աջակցություն»,- «Առաջին լրատվական»-ի հետ զրույցում այս մասին ասաց վերլուծաբան Հակոբ Բադալյանը՝ անդրադառնալով «Հայրենիքի փրկության շարժման» վարչապետի թեկնածու Վազգեն Մանուկյանի հայտարարությանը, թե պետք է պատրաստ լինել կայծակնային արագությամբ՝ ապստամբելով, վերցնելու իշխանությունը:
Հիշեցնենք՝ «Հայրենիքի փրկության շարժման» վարչապետի թեկնածու Վազգեն Մանուկյանի՝ շաբաթ օրը հանրահավաքի ընթացքում արած հայտարարությունների կապակցությամբ ոստիկանությունում հարուցվել է քրեական գործ՝ ՀՀ Քրեական օրենսգրքի 301-րդ հոդվածով (Իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը):
Հակոբ Բադալյանը կարծիք հայտնեց, որ ապստամբության ճանապարհով հնարավոր չէ հասնել լեգիտիմ հանգուցալուծման, և եթե ընդդիմությունը գնա բախումների սցենարով, որևէ մեկը չի շահելու, և կորցնելու է Հայաստանը:
«Ընդդիմության ավելի ու ավելի կոշտացող և ավելի արմատական դարձող հռետորաբանությունը թողնում է վա բանկ գնալու քաղաքականության տպավորություն, այսինքն՝ կարծես վերջին հնարավորության փորձ է արվում»,- նշեց վերլուծաբանը:
Մանրամասն՝ տեսանյութում: