Ապստամբությունը քրեորեն պատժելի է ցանկացած երկրում, երեկ Վազգեն Մանուկյանն իր խոսքում հստակ օգտագործեց ապստամբություն բառը, ապստամբության կոչի հիմքով էլ քրեական գործ է հարուցվել: Այս մասին «Առաջին լրատվական»-ի հետ զրույցում ասաց «Հանուն հանրապետության» ԺՊԴԿ ղեկավար մարմնի անդամ Վահանգն Մարտիրոսյանը՝ անդրադառնալով «Հայրենիքի փրկության շարժման» վարչապետի թեկնածու Վազգեն Մանուկյանի հայտարարությանը, թե պետք է պատրաստ լինել կայծակնային արագությամբ ապստամբելով՝ վերցնել իշխանությունը:
«Երեկվա հայտարարությունները պետք է անպայման ոչ միայն քաղաքական գնահատական ստանան, այլ նաև քրեաիրավական: Հուսով եմ, որ Վազգեն Մանուկյանի նկատմամբ ՀՀ Քրեական օրենսգրքի 301-րդ հոդվածով հարուցված քրեական գործը սեղմ ժամկետներում քննության կառնվի, փաստական հանգամանքներ ի հայտ կբերվեն, և մարդիկ վերջապես պատասխանատվություն կկրեն իրենց անպատասխանատու հայտարարությունների համար»,- նշեց Մարտիրոսյանը՝ ընդգծելով, որ Մանուկյանի հայտարարությունը, ըստ էության, ապստամբության և բախումների գնալու կոչ էր:
Մեր զրուցակցի դիտարկմամբ՝ «17+»-ը ոչ միայն նպատակ չունի ժողովրդի իշխանությունը Հայաստանում հաստատած պահելու, այլ նաև ընդհանրապես ժողովրդի կարծիքը հաշվի չի ուզում առնել. «Հակառակ դեպքում՝ ոչ թե ապստամբության, այլ արտահերթ ընտրությունների մասին խոսք կլիներ»:
Մարտիրոսյանն ընդգծեց, որ իշխանությունը, պատերազմից հետո վախեցած լինելով, ինքն իրեն զրկել է օրինական ճանապարհով այս ամենի դեմն առնելուց, և ավելին՝ նախկին իշխանություններին և վերջին 20-25 տարիների ընթացքում տեղի ունեցածին քաղաքական գնահատական չտալով՝ թույլ է տվել, որ քաղաքական մեռելները վերակենդանանան, հոգեդարձվեն. «Եվ այսօրվա իշխանությունն է, վարչապետի գլխավորությամբ, որ «արհեստական շնչառություն» է տվել և հնարավորություն է տվել վերակենդանանալ այն անձանց, ում ժողովուրդը միասնականորեն մերժել է: Լավ կլինի, որ իշխանությունը սթափվի և սկսի գործել այն տրամաբանության մեջ, ինչի համար տեղի ունեցավ հեղափոխությունը»:
Մանրամասն՝ տեսանյութում: