Վրաստանի ՆԳ նախարարի պաշտոնակատար Վախթանգ Գոմելաուրին հայտարարել է, որ գերատեսչությունն աշխատում է Նիկա Մելիայի կալանավորման ուղղությամբ, որը նախկին նախագահ Միխայիլ Սահակաշվիլիի հիմնադրած «Միացյալ ազգային շարժում» կուսակցության նախագահն է: Այս մասին հաղորդում է ՏԱՍՍ-ը:
Նա նշել է, որ ՆԳՆ-ն դատարանի որոշման կատարման հստակ ժամկետներ չունի:
«Մենք ժամանակի առումով որևէ սահմանափակում չունենք, ուստի տարբերություն չկա՝ մենք այդ որոշումն այսօր կկատարենք, վաղը, մեկ ամսից, թե երեք օրից»,- ասել է Գոմելաուրին:
Նախարարն, այնուամենայնիվ, չի հստակեցրել, թե երբ է իրականացվելու ձերբակալությունը:
Թբիլիսիի դատարանը փետրվարի 17-ին որոշում է կայացրել Մելիայի կալանավորման վերաբերյալ՝ 2019թ.-ի հունիսյան անկարգությունների գործով 40000 լարի (12000 դոլար) գրավը չվճարելու համար: Ինքը՝ Մելիան, հայտարարել է, որ հրաժարվում է կամավոր կատարել դատարանի՝ ձերբակալության մասին որոշումը: Այս դատավարությունը երկրում քաղաքական ճգնաժամ է առաջացրել, որի ֆոնին Վրաստանի վարչապետ Գեորգի Գախարիան հրաժարական է տվել գործընկերների հետ տարաձայնությունների պատճառով:
