Նախօրեին ՖԻՖԱ-ն հրապարակեց 2021 թվականի առաջին դասակարգման աղյուսակը։ Հայաստանի ազգային հավաքականը պահպանելով դիքը՝ շարունակում է մնալ 99-րդ հորիզոնականում։ Մեկ ամսից մեր ազգային թիմը պայքարը կսկսի 2022 թվականի աշխարհի առաջնության ընտրական փուլում։ Այս պահին կարող ենք թերևս արձանագրել, որ մեր գլխավոր թիմը պայքարը սկսում է 99-րդ կետից։ Այս տարի մերոնք անց են կացնելու միանգամից 10 պաշտոնական հանդիպում։
Անցյալ տարի տեղի ունեցած Ազգերի լիգայի վերջին մրցաշարում Հայաստանի ազգային թիմը, հաղթող դառնալով C դիվիզիոնի երկրորդ ենթախմբում, նվաճեց B դիվիզիոնի ուղեգիր։ Ազգերի լիգայի կտրվածքով՝ Հայաստանը բավական լավ դիրքում է և շրջանցել է այնպիսի հավաքականների, ինչպիսիք են Թուրքիան, Բուլղարիան, Սլովակիան, Հյուսիսային Իռլանդիան։ Այս հավաքականները Ազգերի լիգայի հաջորդ խաղարկությունում ելույթ կունենան ավելի ցածր՝ C դիվիզիոնում։ ՖԻՖԱ-ի դասակարգման աղյուսակում, սակայն, մեր դիրքը շարունակում է ցածր մնալ։ Խոակին Կապառոսի թիմին միայն Վրաստանի և Հյուսիսային Մակեդոնիայի նկատմամբ տարած վերջին հաղթանակներից հետո հաջողվեց հայտնվել աղյուսակի լավագույն հարյուրյակում։ Տևական ժամանակ մենք տեղ չունեինք աշխարհի լավագույն 100 ազգային թիմերի շարքում։ Հոկտեմբերին ՖԻՖԱ-ի հրապարակած վարկանիշային աղյուսակում Հայաստանի հավաքականը 101-րդն էր։ Փաստորեն Վրաստանի և Հյուսիսային Մակեդոնիայի հավաքականների նկատմամբ տարած հաղթանակների արդյունքում մերոնք առաջադիմել են ընդամենը երկու հորիզոնականով։ Այս հաշվարկում առաջընթաց ունենալու համար անհրաժեշտ են կայուն ելույթներ գոնե մեկ տարվա կտրվածքով։
Նույն Վրաստանի ազգային հավաքականը, որը Ազգերի լիգայի խաղարկությունում բավարարվեց միայն 3-րդ հորիզոնականով, աշխարհի առաջնության վիճակահանությունից առաջ 4-րդ զամբյուղում էր, մինչդեռ մերոնք 5-րդ զամբյուղում էին։ Նշենք, որ աշխարհի առաջնության ընտրական փուլի զամբյուղները ձևավորվել էին ՖԻՖԱ-ի դասակարգման աղյուսակի հիման վրա։ Որպեսզի սթափ գնահատական տանք դասակարգման ցուցակին, հիշենք, թե ինչ վիճակում էր մեր հավաքականը մինչև Խոակին Կապառոսը։ Մեր ընտրանին պաշտոնական նախավերջին մրցաշարի վերջին խաղում 9։1 հաշվով պարտվել էր Իտալիային։ Ընդունենք, որ նման հաշվով պարտված հավաքականն ուղղակի չէր կարող տեղ ունենալ լավագույն հարյուրյակում։ Ուստի մինչև նոյեմբեր ՖԻՖԱ-ի աղյուսակում մեր դիրքը միանմամայն օբյեկտիվ է։ Վերջին հաղթանակներն այս սանդղակում, ճիշտ է, աննշան, բայց որոշակիորեն բարելավեցին դիրքերը։ Ինչևէ ընտրական շրջափուլին ընդառաջ տեսնեք թե ինչ դիրք են զբաղեցնում մեր մրցակիցները ՖԻՖԱ-ի աղյուսակում։ Հիշեցնենք, որ ընտրական ենաթախմբում մեր մրցակիցներն են Գերմանիայի, Իսլանդիայի, Ռումնինիայի, Հյուսիսային Մակեդոնիայի և Լիխտենշտեյնի հավաքականները։ ԵՎ այսպես աշխարհի քառակի չեմպիոն գերմանացիներն այս պահին միայն 13-րդն են։ Ռումինիայի ազգային թիմը գտնվում է 37-րդ հորիզոնականում, իսկ Իսլանդիան՝ 46-րդն է։
Հյուսիսային Մակեդոնիայի հավաքականը, որին մենք գերազանցեցինք Ազգերի լիգայի խաղարկությունում 65-րդն է։ Նշենք սակայն, որ այս հավաքականը հաղթող դառնալով Ազգերի լիգայի 2018 թվականի առաջնությունում պատմության մեջ առաջին անգամ իրավունք է ստացել մասնակցելու Եվրոպայի առաջնության եզրափակիչ փուլում։ Ընտրական փուլի մրցակիցներից Հայաստանի ազգային հավաքականը գերազանցում է միայն Լիխտենշտեյնին։ Վերջինս գտնվում է 181-րդ հորիզոնականում։
Հիշեցնենք, որ Հայաստանի ազգային հավաքականի առաջ առաջիկա մրցաշարում խնդիր է դրվել հաղթել յուրաքանչուր խաղում, մինչդեռ Խոակին Կապառոսը մոտ մեկ տարի առաջ նշել էր, որ նպատակ ունի Հայաստանի հավաքականի հետ մասնակցել Կատարում կայանալիք աշխարհի առաջնության եզրափակիչ փուլին։