Փետրվարի 1-ից Ռուսաստանի հետ օդային սահմանները բացվել են։ Գեղարքունիքի մարզը, որ արտագնա աշխատանքի մեկնողների թվով գերազանցում է մյուս մարզերին, այս տարի չի շտապում զբաղեցնել առաջին հորիզոնականը արտագնա աշխատանքի մեկնողների թվով։
Մարզի Նորաշեն համայնքի ղեկավար Գառնիկ Գասպարյանը «Առաջին լրատվական»-ի հետ զրույցում նշեց, որ 500 բնակիչ ունեցող Նորաշենում ինչպես ամեն տարի են մեկնել, այս տարի էլ նույնն է. «Անգամ կարող եմ ասել, որ գնացողները ավելի քիչ են, սովորաբար մարտ-ապրիլին են դուրս գալիս: 15-20, 100 մարդ գնում է արտագնա աշխատանքի, հետ գալիս։ Պատերազմը և կորոնավիրուսն այդ առումով որևէ բան չեն փոխել։
Գյուղացիները հիմնականում անասնապահությամբ են զբաղվում, վարելահողերը շատ քիչ են, զբաղվում են կաթի, մսի արտադրությամբ»:
Լճաշեն համայնքի ղեկավար Կորյուն Մարգարյանն էլ ասաց. «Լճաշենն ունի 4200 բնակիչ, ամեն տարի մոտ 100-150 մարդ մեկնում է արտագնա աշխատանքի: Վերջին տարին ավելի քիչ են գնացել՝ մոտ 25 մարդ: Առաջ ընտանիքներով էլ էին գնում, մեկնող 5000 բնակիչ էլ ենք ունեցել, իսկ վերջին երկու տարիներին շատ քիչ են մեկնել։ Կա ցանկություն մեկնելու, եթե այստեղ աշխատանք չկա, հարցը այն է, որ այնտեղ ով կարողանում է աշխատանք ճարի՝ գնում է»:
Հարցին, թե ինչով են զբաղվում գյուղացիները, որոնք սովորաբար մեկնում են արտագնա աշխատանքի, գյուղապետը պատասխանեց. «Ոնց որ մնացած բոլորը՝ հողագործությամբ, անասնապահությամբ են զբաղվում, ամեն մեկը մի ձևով։ Իհարկե, շատերը վարկեր ու պարտքեր են կուտակել, եթե մի բան չստեղծվի, չկուտակվի, անընդհատ ծախս կա, իսկ եկամուտ չկա: Դա կրկնակի ծանրաբեռնվածություն է, բայց հաստատ սոված մարդ չկա Լճաշենում»:
Մարտունի համայնքի ղեկավար Արմեն Ավետիսյանը ևս հավաստիացրեց, որ առանձնապես հոսք չկա դեպի դուրս, նախկին տարիների պես մեկնում են, իսկ այս պահին դեռ սեզոնը չի էլ բացվել, հետևաբար գնացողներն էլ շատ չեն, հիմնական հոսքը կսկսվի մարտ-ապրիլին. «Համայնքն ունի 13 500 բնակիչ, որտեղից շատերն են գնում դուրս: Կովիդը, պատերազմը խանգարեցին մարդկանց, բայց այնպես չէ, որ հիմա հոսքը մեծ է կամ մեծ է լինելու: Այդ առումով Մարտունիում խուճապ չկա»:
Իսկ ահա Դդմաշեն համայնքի ղեկավար Ավետիս Ավետիսյանը նշեց, որ իրենց գյուղից չեն էլ գնում արտագնա աշխատանքի. «Մեզ մոտից ով դուրս է եկել, 1990-ականներին է գնացել, այս պահին չի գնացել: Մեկ ամիս ժամանակ տվեցին, ոչ մեկը չի գնացել։ Մարդիկ չեն ուզում, չեն գնում։ Իրավիճակը նորմալ է, մեկ ամիս հետո հողամասերով են զբաղվելու»,- ասաց նա:
Լուսանկարը՝ panorama.am-ի
