«Ադրբեջանն արդեն մի քանի ամիս է՝ մերժում է որևէ գործընթաց, որը կնպասի տարածաշրջանում ինչ-որ դրական զարգացումների: Սակայն երևի նրանք էլ են գիտակցում, որ ԵԱՀԿ Մինսկի խմբի ֆորմատից չեն կարող խուսափել, սակայն միաժամանակ վախենում են դրա նախաձեռնումից»,- «Առաջին լրատվական»-ի հետ զրույցում նկատեց Մարդկային զարգացման միջազգային կենտրոնի ղեկավար Թևան Պողոսյանը:
Նրա խոսքով՝ հայկական կողմը պետք է անպայման բարձրաձայնի ադրբեջանական օկուպացիայի հարցը Արցախի Հանրապետության նկատմամբ: «Ադրբեջանը խախտել է Արցախի տարածքային ամբողջականությունը. անկախ Ադրբեջանի տարածքում Արցախի Հանրապետությունը երբեք չի եղել: Ադրբեջանը խախտել է նաև ուժի չկիրառման սկզբունքը, և այստեղ պետք է բարձրացնել նրա դեմ սանկցիաների հարցը»,- ասաց նա՝ ԱՀ Ազգային ժողովին խորհուրդ տալով ընդունել օրենք ադրբեջանական օկուպացիայի մասին:
Թևան Պողոսյանի կարծիքով՝ գերիների վերադարձման հարցում պետք է գործադրել այլ մոտեցում, այլ գործիքակազմ, քանի որ գերիների ամեն 5-հոգանոց խմբի վերադարձի դեպքում հայկական կողմը գին է վճարելու. «Ոչ Ադրբեջանը, ոչ էլ Թուրքիան այս տարիների ընթացքում բացարձակապես չեն փոխվել, և մենք պետք է պատրաստ լինենք պաշտպանելու մեր շահերը»:
Առավել մանրամասն՝ տեսանյութում:
