«Ես հետևում եմ միայն տնտեսական դինամիկային. տնտեսության վերականգնումն ամենակարևորն է, ինչքան շուտ լուծենք տնտեսության վերականգնման խնդիրը՝ առանց նայելու խոչընդոտներին և պատճառներին, այդքան շուտ կլուծվեն մյուս հարցերը: Իմ խորին համոզմամբ՝ պետք է սևեռվել տնտեսական խնդիրները լուծելու, տնտեսական աճը վերականգնելու, տնտեսական հզորությունն աճեցնելու վրա»,- այս մասին «Առաջին լրատվական»-ի հետ զրույցում ասաց Էկոնոմիկայի նախարար Վահան Քերոբյանը՝ անդրադառնալով դիտարկմանը, որ հետպատերազմյան շրջանում փորձ է արվում ախտորոշել, թե տվյալ փուլում ինչ փոփոխություններ են արվում:
Անդրադառնալով հարցին, թե ճգնաժամից դուրս գալու որ փուլում է գտվում մեր տնտեսությունը՝ նախարարը նշեց. «Արդեն դուրս ենք գալիս ջրի երես. փետրվարի առաջին կեսի տվյալները բավականին խոստումնալից են: Բոլոր ազդակներն իրար գումարած՝ դրական տնտեսական արդյունքների գրանցման հույս ունեք, անկախ տուրիզմի ոլորտի դեռևս սահմանափակված լինելուց և մյուս ոլորտների որոշ չափով կաշկանդված լինելուց»:
Դիտարկմանը, որ ըստ վիճակագրության՝ շատ բիզնեսներ փակվում են, նախարարը նշեց, որ վիճակը շատ վատ է, բայց ամեն ինչ արվում է, որ ինչքան հնարավոր է շատ բիզնեսներ լավ զգան իրենց և ինչքան հնարավոր է շատ ոլորտներ օր առաջ վերականգնվեն. «Ես և իմ թիմը շատ աշխատանք ենք իրականացնում, որպեսզի հայկական փոքր, միջին և մեծ բիզնեսներն իրենց լավ զգան և օգնեն տնտեսության վերականգնմանը»:
Նախարարի խոսքով՝ Հայաստանը պետք է դառնա տեխնոլոգիական երկիր, դա այլընտրանք չունի. պետք է հրատապ մոդեռնիզացնենք մեր տնտեսությունը»:
Մանրամասները՝ տեսանյութում:
