Արցախի ԱԺ 5 խմբակցություններից 3-ը՝ «Ազատ հայրենիքը, «Արդարությունը» և «Միասնական հայրենիքը» առաջարկում են լրացումներ և փոփոխություններ իրականացնել «Լեզվի մասին», ինչպես նաև «Հեռուստատեսության և ռադիոյի մասին» օրենքներում՝ առաջարկելով Արցախում ռուսերենը դարձնել երկրորդ պետական լեզու:
Իրենց առաջարկությունը հիմնավորում են այսպես. «Հաշվի առնելով Արցախի և Ռուսաստանի մշակութային, ռազմական, տնտեսական հարաբերությունների պատմական հիշողությանը և այն փաստը, որ բազմաթիվ արցախցիների համար շփման երկրորդ լեզու է հանդիսանում ռուսերենը` կարևոր ենք համարում նոր որակի հարաբերությունների վերաարժևորումը և նոր օրակարգի ձևավորումը։ Այս համատեքստում առաջնահերթ ենք համարում ռուսաց լեզվի կարգավիճակի բարձրացումը»։
«Սա շատ խոցելի և պահի խուճապով թելադրված օրենքի նախագիծ է»,- թեմայի շուրջ «Առաջին լրատվական»-ի հետ զրույցում այս մասին ասաց «Ժառանգություն» կուսակցության վարչության նախագահ, լեզվաբան Նարինե Դիլբարյանը՝ ընդգծելով, որ Արցախում խուճապային տրամադրություններ կան, որոնք հիմնավորված են մեկ փաստարկով, որ Հայաստանը կորցրել է Արցախի անվտանգության երաշախավորը լինելու գործառույթը:
«Այս պայմաններում, ելնելով նաև այն հանգամանքից, որ Արցախում ռուս խաղաղապահներն են տեղակայված, ամեն կերպ փորձում են լուծել անվտանգային խնդիր: Բայց խուճապի ժամանակ ծնվում են սխալ որոշումներ»,- նշեց Դիլբարյանը:
Նրա դիտարկմամբ՝ ազգային ինքնության ճգնաժամով թելադրված նախագիծ է բերվել, որը ռուսներին ծառայություն չի մատուցի, իսկ արցախցիների համար վտանգավոր է. «Արցախում այժմ վտանգավոր քամիներ են: Հուսով եմ, որ Արցախի և՛ ժողովուրդը, և՛ այդ խորհրդարանական ուժերը կհասկանան, որ ռուսաց լեզվին կարգավիճակ տալը սխալ ճանապարհ է և իրենց հեռացնում է Արցախի անվտանգության խնդրից ու Արցախի՝ իբրև քաղաքական, պետական ազգային գործոնի պահպանումից»:
Մանրամասն՝ տեսանյութում: