Ռազմական փորձագետ Դավիթ Ջամալյանը, խոսելով ԼՂ խնդրի կարգավորման հարցում կատարվելիք փոխզիջումների մասին, նշեց.
«Արցախի պաշտոնյաները հանդես եկան հայտարարությամբ և հստակեցրին, թե ինչ է փոխզիջումը։ Այստեղ անորոշ մի բան կար այն առումով, որ մեզ համար հստակ չէր, թե ինչ է պատրաստ զիջել ադրբեջանական կողմը։ Շատ սկզբունքային հայտարարություն արվեց Արցախից, որ 1988-ի իրողություններին վերադարձ լինել չի կարող հենց վարչատարածքային առումով, որը կարևոր դիտարկում էր։ Սա Արցախի բնակչության իրատեսական լինելու արդյունք է»։
Նա նաև փաստեց, որ շատ կարևոր է, որ Ադրբեջանում հասկանան, որ Հայաստանի համար հաղթանակը սակարկելի չէ.
«Սա կարևոր, սկզբունքային դրույթ է, որը պիտի լայնորեն տարածվի նաև մեզանում»,- ապա հավելեց.
«Պատահական չէ, որ Ադրբեջանը տարիներ շարունակ ցանկանում է հակամարտությունը ներկայացնել որպես ՀՀ-Ադրբեջան հակամարտություն։ Եթե ՀՀ-ն է հանդես գալիս որպես հակամարտող կողմ, ապա հայկական կողմը փոխզիջումների հարցում ավելի խոցելի է դառնում։ Իսկ երբ Արցախն է բանակցային կողմի դերում, երբ ինքն է խոսում իր տարածքնրի օկուպացիայի մասին, այս պարագայում, իհարկե, փոխզիջումների բովանդակությունը էապես փոխվում է։ Մեզ համար շահեկան է, որ հնարավորինս շուտ Արցախը դառնա բանակային կողմ»։
Ինչ վերաբերում է ապագայում հակամարտության կարգավորմանը, ապա այս հարցում փորձագետը լավատես չէ. «Փաստ է, որ ստատուս-քվոյի պահպանումը տեսանելի հեռանկարում անխուսափելի է։ Փաստ է, որ ադրբեջանական հանրույթի մոտ մաքսիմալիստական դիրքորոշումները շատ ամուր են դեռևս։ Այն, ինչ մենք ենք ընկալում խաղաղություն ու խնդրի կարգավորում ասելով, դեռ շատ հեռավոր ապագայի հարց է։ Մենք ուղղակի ժամանակը պետք է օգտագործենք ի նպաստ մեզ՝ հաղթանակը ավելի ամրապնդելու համար»։