Սպորտային հագուստի և աքսեսուարների գերմանական Adidas AG ընկերությունը որոշել է վաճառել ամերիկյան Reebok ապրանքանիշը: Այս մասին հաղորդում է Reuters-ը:
Համապատասխան որոշումն ընդունվել է ընկերության մշակած հնգամյա ռազմավարության շրջանակում, որը կներկայացվի մարտի 10-ին:
«Ընկերությունը որոշել է Reebok-ի վաճառքի պաշտոնական գործընթաց սկսել»,- հստակեցրել է ընկերությունը:
Adidas AG-ն հավելել է, որ գործարքը կամրապնդի ընկերության դիրքերը միջազգային շուկայում, որտեղ հիմնական մրցակիցը ամերիկյան Nike Inc. ընկերությունն է:
Reebok-ը գերմանական ընկերությանն է պատկանում 2006 թվականից: Adidas AG-ը նշել է, որ 15 տարվա ընթացքում իրենց չի հաջողվել վերակենդանացնել ապրանքանիշը: Մասնավորապես, ապրանքանիշը խիստ տուժել է համաճարակի պատճառով. Reebok-ի եկամուտները 2020թ.-ի երկրորդ եռամսյակում կրճատվել են 42%-ով: