«Ցավոք, նորանկախ Հայաստանի քաղաքական միտքը երբեք աչքի չի ընկել քաղաքական գործընթացների գլոբալ տեսլականով: Աշխարհաքաղաքական կենտրոններում խնդիրների անտեսումը կամ չդիտարկումը հայ քաղաքական մտքի և հայ քաղաքական գործիչների կողմից շատ ծանր անդրադարձ է ունեցել մեր երկրի համար: Դրա վառ օրինակը վերջին պայթած պատերազմն էր, որն ուղղակի աղետալի հետևանքներ ունեցավ մեր պետության, մեր ժողովրդի համար»,- «Առաջին լրատվական»-ի հետ զրույցում ասաց կառավարման փորձագետ, վերլուծաբան Սերոբ Անտինյանը՝ անդրադառնալով աշխարհաքաղաքական նոր իրողություններին:
Նրա խոսքով՝ մեր պետական ու ազգային խնդիրները բնավ էլ լոկալ չեն. «Դրանք նույնիսկ տարածաշրջանային խնդիրներ չեն. դրանք իրենց նշանակությամբ ու ազդեցությամբ գլոբալ խնդիրներ են, որոնք գտնվում են ամբողջ աշխարհի շահերի բախման կիզակետում: Իսկ այսօր աշխարհում տեղի է ունենում նոր աշխարհակարգի ձևավորման կամ նոր հարաբերությունների կազմավորման գործընթացների մեկնարկ: Այդ գործընթացները մեկնարկել են ԱՄՆ-ում դեմոկրատների նոր իշխանության պահից սկսած, երբ հայտարարվեց, որ Միացյալ Նահանգները վերադառնում է ակտիվ քաղաքականություն, գլոբալ զսպումների քաղաքականություն»:
Ինչ վերաբերում է Հայաստան-Թուրքիա հարաբերություններին կամ այդ հարաբերությունների բացակայությանը, մեր զրուցակիցն ասաց. «Արցախյան հիմնախնդիրը Հայաստանին ուղղված Թուրքիայի միակ պահանջը չէ: Թուրքիան բազմիցս ասել է, որ Հայաստանի հետ հարաբերությունները կարող են որևէ կերպ սկսվել Ցեղասպանության հրաժարումից, Կարսի պայմանագրի ճանաչումից և բազում այլ ենթահարցերից: Մենք պետք է գիտակցենք սա, հասկանանք, թե արդյոք Թուրքիայի այդ նախապայմանները սպառի՞չ են, թե՞ դրանց կարող են հաջորդել այլ նախապայմաններ: Ես այն համոզմունքն ունեմ, որ Թուրքիայի նպատակը տարածաշրջանում Հայաստանի չլինելն է»:
Առավել մանրամասն՝ տեսանյութում:
