Պատերազմի և խաղաղության լուսաբանման ինստիտուտի կազմակերպած բանակի մասին քննարկմանը մասնակցում էին լրագրողներ, իրավապաշտպաններ, զոհված զինծառայողների ծնողներ։ Հելսինկյան քաղաքացիական ասոցացիայի Վանաձորի գրասենյակի ղեկավար Արթուր Սաքունցը նկատեց, որ հասարակության հետաքրքրությունն ու ուշադրությունը բանակի նկատմամբ փոխվել է, ինչի պատճառը տարիների ընթացքում տեղի ունեցած հանցագործություններն են, որոնք չեն բացահայտվել։ Ըստ նրա՝ բանակային միջադեպերի նկատմամբ ավելի մեծ ուշադրություն սկսեցին դարձնել երկու տարի առաջ, երբ քննվում էր հայտնի «Մատաղիսի գործը». «2010թ. ՀՀ զինված ուժերում 44 մահվան դեպք է եղել, որոնցից, պաշտոնական հաղորդագրություններով, միայն 7-ի պատճառն է եղել հրադադարի ռեժիմի խախտումը: Մնացած 37 դեպքերի հիմնական պատճառները զորամասերում կանոնադրական կարգի խախտման ու հրամանատարների կողմից իրենց դիրքի չարաշահման հետ են կապված»: Իրավապաշտպանի գնահատմամբ` այժմ բանակն ավելի հասանելի է դարձել և այլևս չեն կարողանում վերահսկել տեղեկությունների գաղտնիությունը։ Արթուր Սաքունցը նաեւ դրական գնահատեց այն, որ հիշյալ միջադեպերը ինչ-որ չափով լուսաբանվում են, ինչն էլ ավելի կհեշտացնի համակարգի առողջացումը։ Նրա կարծիքով, հասարակության ուշադրության մեծացումը բանակի և բանակային միջադեպերի նկատմամբ կկանխի հետագա հանցագործությունները։ Իրավապաշտպան, Հելսինկյան ասոցացիայի նախագահ Միքայել Դանիելյանն էլ նկատեց, որ մեր բանակն ունի երկու պրոբլեմ՝ կրիմինալիզացիան և անօրինականությունը։ Անդրադառնալով պաշտպանության նախարարի և ոլորտի այլ բարձրաստիճան ներկայացուցիչների հրաժարականի պահանջներին՝ Դանիելյանը նշեց, որ անձերի փոփոխությամբ խնդիրը չի լուծվի, կարևոր է օրինականության հաստատումը։