ԱՄՆ պետքարտուղար Հիլարի Քլինթոնը հայտարարել է, որ Սիրիայի նախագահ Բաշար Ալ-Ասադը պատասխանատվություն է կրում խաղաղ ցույցերը ճնշելու ժամանակ սպանված ավելի քան 2,000 մարդու կյանքի համար: Այս մասին հաղորդում է BBC-ն:
Ամերիկյան արտաքին գերատեսչության ղեկավար Քլինթոնն ասել է, որ կավելացվի ճնշումը Սիրիայի իշխանությունների վրա, որպեսզի վերջ դրվի բողոքի ակցիաների ճնշմանը անվտանգության ուժերի կողմից: Քլինթոնը կրկնել է նախկինում արված այն հայտարարությունը, թե Սիրիայի ներկայիս ռեժիմը կորցրել է իր լեգիտիմությունը:
ԱՄՆ պետքարտուղարի հայտարարությունը պատահական չէ, քանի որ այս օրերին ծայրահեղ սրվել է իրավիճակը Սիրիայի կենտրոնական շրջաններում, որտեղ բանակը մի քանի օր շարունակ փորձում է վերականգնել հսկողությունը այդ երկրի ամենամեծ քաղաքներից մեկում` Համայում: Այս պահի դրությամբ հաղորդվում է հարյուրավոր զոհերի և վիրավորների մասին: