Diaspora սոցիալական կայքը, որն ավելի հայտնի է որպես «հակա-Facebook», նամակներ է ուղարկել բոլոր նրանց, ովքեր հայտ են ներկայացրել նրա կայքում` առաջարկելով փորձարկել կայքի ալֆա-տարբերակը: Այս մասին հաղորդել է The next Web կայքը: Ըստ կայքի փորձագետների, կայքը բավականին հաջող է, սակայն հատուկ նոր ծառայություններ չի առաջարկում: Նրա միջերեսը նման է և՛ Facebook-ին, և՛ Twitter-ին, սակայն տարբերությունն այն է, որ օգտատիրոջ հաղորդագրությունները հրապարակվում են ոչ թե բոլոր հրապարակումների հետ մեկտեղ, այլ տեղադրվում են ըստ թեմաների տարբեր բաժիններում` ընտանիք, ընկերներ, աշխատանք և այլն: Ցանկության դեպքում նույն հրապարակումը կարող եք տեղադրել տարբեր բաժիններում: բացի այդ Diaspora-ն լուրջ ուշադրություն է դարձնելու անվտանգության խնդիրներին, ի տարբերություն Facebook-ի, որի անվտանգության խնդիրները վերջին շրջանում լուրջ քննարկումների տեղիք են տվել:
Չնայած նրան, որ կայքն ունի «հակա-Facebook»-յան լուրջ համբավ, այն շատ լուրջ ինտեգրված է թե՛ Facebook-ին և թե՛ Twitter-ին, և Diaspora-ում տեղադրած հրապարակումները ցանկության դեպքում ավտոմատ կերպով կարող են վերահրապարակվել նաև վերնոշյալ սոցիալական կայքերում:
Diaspora-ն ստեղծվել է նյույորքյան մի խումբ ուսանողների կողմից, իսկ գումարները նրանք հավաքել են օգտատերերի փոքր վճարումներից: Ընդհանուր առմամբ հավաքվել է $200 հազար:
