Ընտրությունների թեման շարունակվելու է, նույնիսկ բորբոքվելու է: Այս մասին «Առաջին լրատվական»-ի հետ զրույցում ասաց Գերագույն խորհրդի նախկին պատգամավոր Ազատ Արշակյանը:
«Իմ քայլի» հայտարարությունը, ընդհանուր առմամբ, այն մասին էր, որ իր համար հարմար է այս վիճակը, այսինքն՝ ունենալ Ազգային ժողովում «ԴՈՏեր և ԴԶՈՏներ». դա իրենց հարմար է: Կարծում եմ՝ սա խայտառակ հայտարարություն է:
Հայարարում են, որ արտահերթ ընտրությունների պահանջ չկա: Այսինքն՝ ԱԺ-ից դուրս մնացած ուժերը չունե՞ն պահանջ: «Իմ քայլը» պետք է հայտարարեր, որ հասարակությունն այդպիսի պահանջ ունի, բայց դա իրենց հարմար չէ: Ազգային ժողովի արտահերթ ընտրություններին բոլորը կողմ են, բայց տարբեր ժամանակներում և տարբեր կազմակերպչի միջոցով:
Ես միշտ ասել եմ, որ Նիկոլ Փաշինյանը պետք է մասնակցի և աջակցի նոր ԱԺ-ի ձևավորմանը: Քաղաքական իշանությունը պետք է որոշ բաներ պարտադրի, այդ թվում նաև ժողովրդավարություն»,- նշեց Արշակյանը:
«Հանուն հանրապետության» ԺՊԴԿ անդամ Արտաշես Խալաթյանը հավելեց, որ 2018թ. ընտրություններում 70 տոկոս ձայն ստացած իշխող մեծամանությունը պետք է դադարի աջուձախ նայել և ոչ անհրաժեշտ համախոհություն փնտրել իր քաղաքական օրակարգի իրացման համար:
«Կարծում եմ, որ «Իմ քայլը» ևս զգում է քաղաքական դաշտի ռեստարտի անհրաժեշտությունը:
Ներքաղաքական և արտաքին քաղաքական կատակլիզմներից հետո «Իմ քայլը» պետք է նախաձեռնի երկրի ներքաղաքական վիճակի վերբեռնման գործընթաց: «Իմ քայլը» պետք է առնվազն հայտարարի մոտալուտ ընտրությունների ժամկետը, նախաձեռնի խորհրդարանի ինքնալուծարման գործընթացը և գնա արտահերթ ընտրությունների: Մինչ այդ կանախարգելիչ քայլեր պետք է իրականացվեն, որպեսզի ապահովվի ընտրությունների օրինականությունը և արժանահավատությունը»,- նշեց Խալաթյանը՝ ընդգծելով, որ ներքաղաքական վիճակի նյարդայնությունը անորոշությունից է գալիս:
«Կարծում եմ՝ արտահերթ ընտրությունների հարցը այժմ էլ օրակարգում է»,- նշեց «Արդար Հայաստան» նախաձեռնության անդամ Ռաֆայել Հովհաննիսյանը՝ հավելելով, որ հայտարարվել է, որ հանրային պահանջ չկա, բայց դա չի նշանակում, որ արտահերթ ընտրություններ չեն լինելու: «Բոլոր այն ուժերը, որոնք համարում են, որ արտահերթ ընտրությունների անցկացումն անհրաժեշտություն է, պետք է շարժվեն իրենց օրակարգով՝ սահմանադրական ճանապարհով»,-նշեց Հովհաննիսյանը:
Մանրամասները՝ տեսանյութում: