Այն անկախությունը, որ այսօր ունեն դատավորները, նախկինում չունեին: Այս մասին «Առաջին լրատվականի» հետ զրույցում ասաց ԲԴԽ անդամ Ստեփան Միքայելյանը:
«Կային իրավիճակներ, երբ որ տարբեր իրավական հարցերի, տարբեր իրավական նորմերի կիրառման մեկնաբանությունների կապակցությամբ փորձ էր արվում միմիայն ինքնուրույնաբար հարցին լուծում չտալ, այլ նաև տեսնել, թե վերադաս ատյաններում ինչ մոտեցում ունեն այդ հացի վերաբերյալ»,- ասաց Միքայելյանը:
«Այսօր ունենք որակապես նոր դատական համակարգ: Այս անկախությունը համակարգային բնույթ է կրում, և դա առաջին հերթին դատավորներին էր անհրաժեշտ»,- ընդգծեց ԲԴԽ անդամը:
Նա նաև վստահեցրեց, որ հին մտածողությամբ դատավորներ գրեթե չկան, դատական համակարգում սերնդափոխություն է տեղի ունեցել:
Անդրադառնալով վարչապետի՝ «վնգստացող դատավորներ» արտահայտությանը՝ Ս. Միքայելյանը նշեց. «Երբ որ «վնգստացող դատավորներ» արտահայտությունը վերաբերում է նվաստացնելուն, դա բնականաբար ընդունելի չէ: Եթե դա վերաբերում է նրան, որ իրականության մեջ գոյություն ունի մարդկանց մի խումբ, որոնք իրենց վարքագծով այդ կերպ են պահում, ապա այդ հռետորաբանությունը վերաբերելու է միայն այդ կատեգորիայի մարդկանց, որոնց պետք է սթափեցնել, դա կարծես սթափեցման կոչ լինի՝ վերադարձեք ձեր նորմալ կարգավիճակի մեջ: Ես չեմ կարծում, թե նպատակը եղել է գնահատական տալը և նվաստացումը»:
Անդրադառնալով ԲԴԽ նախագահ Ռուբեն Վարդազարյանի հայտարարությանը՝ «վնգստացնող դատավորների» մասին, Ստեփան Միքայելյանը նշեց. «ԲԴԽ նախագահը կոչ է արել՝ հիմա այն շրջանն է, որ ձեր վարքագծով պետք է ապացուցեք, որ նման դատավորներ չեք, և այս ծանր իրավիճակում պետք է լինեք անաչառ, սադրանքի չտրվեք և բացառապես օրենքը դարձնեք ձեր գլխավոր զենքը»:
Մանրամասները՝ տեսանյութում: