Կենտրոնական բանկի կանխատեսմամբ՝ 2020 թվականի տնտեսական անկումը կկազմի 7,8 տոկոս։ Կան պնդումներ, որ եթե այս տեմպը շարունակվի, ապա պարզ չէ, թե ինչ է սպասվելու մեր տնտեսությանը։
Կա՞ն հիմքեր պնդելու, որ անկումը շարունակվում է․ «Առաջին լրատվական»-ի հարցին տնտեսագետ Գագիկ Մակարյանը պատասխանեց․ «Այո, մի քանի հիմքեր կան պնդելու նման բան, որովհետև տնտեսության անկման պրոցեսը դանդաղեցնելու կամ դադարեցնելու համար հարկավոր են մի շարք գործառույթներ, որոնք պետք է արդեն սկսեր կառավարությունը, բայց դեռևս ուշանում են։
Դրանցից մեկն այն է, որ պետք է ավելի հեշտացված միջավայր ստեղծվի ձեռնարկատիրության համար։ Ամենակարևորն այն է, որ կառավարությունն իր պետական գնումների համակարգով ու ռեֆորմներով շատ արագ նպաստի դրան։ Երկրորդը՝ որոշակի ճյուղեր ունեն էական պոտենցիալ, որ կարող են և՛ տնտեսական աճ ապահովել, և՛ գործազրկությունը նվազեցնել։ Այդպիսի ճյուղերը պետք է շատ արագ ընթացքի տրվեն՝ այդ թվում նաև շինարարությունը, որովհետև այն կարող է շինարարական նյութերի այդ ամբողջ շղթան ընդլայնել։
Հաջորդը՝ խոսվում է թուրքական ապրանքներն արգելափակելու մասին, նույնիսկ որոշում կայացվեց, սակայն էական քայլեր դեռ չեն արվել, թե ինչպիսի ապրանքներ կարող ենք Հայաստանում արտադրել։ Դա թողել ենք բիզնեսի հույսին, բիզնեսի տրամադրվածությանը, որը հոգեբանորեն դեռ պատրաստ չի։ Պատերազմական վիճակն ու այս անկման պրոցեսը ցույց տվեցին, որ բիզնեսի մեջ կա որոշակի հոռետեսություն կամ սպասողականություն, որը պետք է արագ ցրել։ Դրա համար պետությունն իր գործիքակազմով ինչ-որ ճյուղերում պետք է քայլեր կատարեր, որպեսզի այդ ներմուծումները փոխարինվեին տեղական արտադրություններով»։
Մանրամասները՝ տեսանյութում։