Կենտրոնական բանկը, ներքին և արտաքին շուկաններն ուսումնասիրելով, 0,25 կետով բարձրացրել է վերաֆինանսավորման տոկոսադրույքը, սահմանելով 5,5 տոկոս։
Վերաֆինանսավորման բարձրացում, փողերի թանկացում, հետևաբար նաև ներդրումների կրճատո՞ւմ․ «Առաջին լրատվական»-ի հարցին Կենտրոնական բանկի խորհրդի անդամ Հովհաննես Խաչատրյանը պատասխանեց․ «Մինչև հետևություններ անելը, կարճ ասեմ պատճառները։ Մոտ մեկուկես ամիս առաջ մենք տոկոսադրույքը բարձրացրինք 1 տոկոսային կետով՝ ի պատասխան գնաճի արագացման․ դեկտեմբերին մենք ունեինք 3,7 տոկոս գնաճ, հունվարին ունենք 4,5 տոկոս, որը մեր կանխատեսման սցենարներին համահունչ է։ 0,25 կետով բարձրացնելը ցույց է տալիս, որ Կենտրոնական բանկը ինչ-որ առումով շարունակում է դեռ պայքարել գնաճի սպասումների և արագացող գնաճի դեմ, բայց այդ ռիսկերը գնալով կրճատվել են, և այդ քայլը շատ փոքր է՝ համեմատած նախորդ քայլի հետ։ Բնականաբար, այլ տոկոսադրույքները շատ կամ քիչ չափով արձագանքելու են Կենտրոնական բանկի տոկոսադրույքին։ Դրանք կլինեն արժեթղթեր, ավանդներ, ինչ-որ չափով նաև վարկեր։ Պարտադիր չի, որ բոլոր սեգմենտներում նույն կերպ անդրադառնա»։
Արձագանքելու են, նկատի ունեք՝ բացասակա՞ն․ «Առաջին լրատվական»-ի հարցին Հովհաննես Խաչատրյանը պատասխանեց․ «Այո, դեպի վերև։ Եթե Կենտրոնական բանկը վերև է տանում, ապա հազվադեպ կարող է հակառակ իրավիճակ լինել։ Մինչ այս ավանդների տոկոսադրույքների ճշգրտումներ չէինք տեսել միայն այն պատճառով, որ տարեվերջ էր։ Հունվար ամսից արձագանք կլինի, որը խթանելու է խնայողությունները, այդ թվում նաև դրամով խնայողությունները։ Հետո դա կարող է բերել վարկավորման որոշ պրոդուկտների բարձրացման՝ բանկերի մարժաների հաշվին։ Մենք դա ինչ-որ առումով արդեն տեսնում ենք»։
Մանրամասները՝ տեսանյութում։