Օրերս մեկնարկեց «Ուժեղ Հայաստան Ռուսաստանի հետ. հանուն նոր միության» շարժման հիմնադիր համագումարը: Շատերին հետաքրքրում է, թե ինչ սեգմենտի վրա են այդ ուժրը կառուցում իրենց վեկտորը, և ովքեր են այն մարդիկ, որոնք շահագրգռված են, և ինչ հեռանկարներ ունի այս շարժումը՝ հաշվի առնելով նոր իրողությունները:
Թեմայի շուրջ «Առաջին լրատվական»-ի հետ զրույցում դերասան, քաղաքական սատիրիկ, Dankar.am կայքի հիմնադիր Սերգեյ Դանիելյանը նշեց, որ լրատվամիջոցները յուրաքանչյուր շարժ կարող են ներկայացնել որպես շարժում և հավելեց, որ չպետք է խոսել նրանց մասին: «Այսօր պետական ինստիտուտները թույլ են, պատերազմական շոկն ուժեղ է, պետությունը դեռ խելքի չի եկել, չկա քաղաքական դաշտ, և մարդիկ ման են գալիս ելքեր, և դա էլ համարում են ելքերից մեկը: Բայց թող հանգստանան, Ռուսաստանին պետք չենք»,- ասաց Դանիելյանը՝ վստահեցնելով, որ այդպիսի շարժումը, եթե դա կարելի է շարժում համարել, չի կարող զարգացում ունենալ:
Դերասանի խոսքով՝ Վազգեն Սարգսյանը և Կարեն Դեմիրճյանն արդեն ուզում էին ԱՄՆ-ի հետ հարաբերություններ զարգացնել և ՀՀ արտաքին քաղաքականության բազմավեկտոր լինելն աահովել, բայց Հոկտեմբերի 27-ով այդ իշխանությունը ոչնչացվեց և Հայաստանի ուղեծիրը փոխվեց. «Կարծում եմ՝ հիմա էլ այդպես կլինի, եթե բազմավեկտորություն ընտրենք»:
Անդրադառնալով դիտարկմանը, որ ընդդիմությունը նույնպես միավեկտոր է աշխատում, դերասանը նկատեց, որ մեր արտախորհրդարանական ընդդիմության մեծ մասը կապված է Ռուսաստանի հետ. «Դա օլիգարխիկ ընդդիմություն է, որը բազմաթիվ թելերով կապված է Ռուսաստանի հետ»:
Սերգեյ Դանիելյանի խոսքով՝ մեր քաղաքական դաշտում հիմնականում մարդ կուսակցություններ են, և երազել, որ հիմա կստեղծվի մի կուսկացություն, որը կհամախմբի մարդկանց և կանցնի խորհրդարան, դա չի լինի:
Անդրադառնալով Ռ. Քոչարյանի հայտարարությանը, որ վերադառնում է ակտիվ քաղաքականություն, դերասանը կարծիք հայտնեց, որ Քոչարյանն այն անձը չէ, որի շուրջ կհամախմբվի ժողովուրդը:
Անդրադառնալով դիտարկմանը, որ «Իմ քայլը» հայտարարել է, թե արտահերթ ընտրություններ անցկացելու պահանջարկ չկա, և որ խորհրդարանական և ոչ խորհրդարանական ընդդիմությունը պահանջում է հրաժարական, որից հետո նոր անցկացնել ընտրություններ, Դանիելյանը նշեց, որ կուսակցություններից ոչ մեկը ծրագիր չի ներկայացրել: «Ես այսօր չեմ հավատում և չեմ աջակցում ոչ մի քաղաքկան միավորի: Ինչպես և առաջ, ես աջակցում եմ իմ ժողովրդին, որն ուզում էր համակարգ փոխել: Ես առաջարկում եմ, բացի իր գործը բարեխիղճ կատարելուց, մարդն զբաղվի նաև ինչ-որ այլ օգտակար գործով: Եթե ամեն մեկը լծվի աշխատանքի, կստեղծվեն հանրային ինստիտուտները: Եթե չենք հասցնի ստեղծել, մեզ «կուտեն»:
Հարցին, թե արդյո՞ք միգրացիա քարոզելու միտում է նկատում, դերասանը նշեց, որ, այո, կա, և ամեն ինչ ուռճացնում են, որ ուզենաս փախչել այս երկրից: «Դա արվում է, որ այս իշխանությունը տապալվի, բայց բոլորս մի նավում ենք: Հիմա մենք շանս ունենք խելք հավաքելու և գործ անելու: Մենք ունենք վիրավոր զինվորներ, որոնք ունեն լուրջ խնդիրներ, անտուն մնացած հայրենակիցներ, միգուցե այդ հարցերով զբաղվենք, դա ավելի կարևոր չէ՞, քան այն, թե ով կլինի քաղաքական դաշտում: Քաղաքական գործիչները զուգարանի թղթի պես են, օգտագործում, գցում են դեն: Վաղը լավ կլինի, եթե այսօր մենք բուժվենք: Արտագաղթը չի փրկում: Բոլոր երկրներում էլ խնդիրներ կան»,- նշեց դերասանը:
Մանրամասները՝ տեսանյութում:
