Հայաստանում գործող քաղաքական ուժերն ու քաղաքական գործիչներն արդեն համակարեպվել են այն մտքի հետ, որ տեղի են ունենալու արտահերթ ընտրություններ, և ուզում են իրենց տեղն ու դերը որոշել այդ պայքարի մեջ: «Առաջին լրատվական»-ի հետ զրույցում այս կարծիքը հայտնեց «Հանուն հանրապետության» ԺՊԴԿ անդամ, փաստաբան Վահագն Մարտիրոսյանը՝ հավելելով, որ դրա վերջին վկայությունը Ռոբերտ Քոչարյանի հայտարարությունն էր այն մասին, որ մասնակցելու է արտահերթ ընտրություններին: «Կարծում եմ՝ նրան այդ որոշմանն է բերել այն փաստը, որ ընդդիմության «17+» ձևաչափը փլուզվել է: Բոլոր այն քաղաքական ուժերը, որոնք հույս ունեն, որ կմնան քաղաքական դաշտում, սկսել են նախապատրաստվել ընտրություններին»:
Պատմաբան Վահրամ Թոքմաջյանի դիտարկմամբ՝ ոչ բոլոր ուժերն են խաղի մեջ. «Լռում է առաջին նախագահը, լռում են գաղափարական ու բովանդակային առումով ավելի կենսունակ ուժերը, կան խմորումներ, որոնք հրապարակային չեն, բայց, մեծ հաշվով, երկրորդ նախագահի այդ հայտարարությունը առավելագույնս պարզություն մտցրեց դաշտում: Ես խղճում եմ բոլոր այն մարդկանց, որոնք կողմնակիցն են 16-ի ուժերի, որոնք «քֆուր» էին դրել ընտրություններին մասնակցողների վրա, բերանները բացել էին Գյումրիից մինչև Երևան, հիմա նրանք ոչ կոմֆորտ վիճակում են հայտնվել:
Իսկ ընտրություններին այլընտրանք չկա, այլընտրանքը բռնությունն է, այլընտրանքը պետական համակարգի և պետության ոչնչացումն է, Հայաստանը չի կարող բռնի հեղաշրջում հանդուրժել: Ճիշտ են անում, որ խաղում են բաց, թափանցիկ, հրապարակային խոսքով: Քաղաքական դաշտում առկա մաղձը, օդում կախված պայթյունի վտանգն ինչ-որ առումով չեզոքացվում է, երբ որ առանցքային դեմքերն են հայտարարում, որ պատրաստ են մասնակցել ընտրություններին»:
Պատմաբանի խոսքով՝ նախկին նախագահների հանդիպումը չպետք է համարել միավորում, քանի որ անցյալի կենասփորձը այլ բան է ցույց տալիս. «Վեցը, որ փորձում են նոր ձևաչափ ձևավորել, դեռ իրար համոզելու բան ունեն»:
Թոքմաջյանի դիտարկմամբ՝ նորը դեռ չկա, մեր պատմության անիվը դեռ պտտվում է նախորդ 30 տարիների թողած ժառանգության շուրջ:
Անդրադառնալով դիտարկմանը, որ դեպի Մոսկվա նայելու և իշխանության հասնելու համար Մոսկվա հասնելու ավանդույթը պահպանվում է՝ Վահագն Հովակիմյանը պնդեց, որ հին Հայաստանի բոլոր քաղաքական դեմքերի հայացքը դեպի Մոսկվա է ուղղված. «Նրանք համարում են, որ ցանկացած հարցի լուծումը գտնվում է Մոսկվայում, նոր Հայաստանի քաղաքական ուժերը հարցի լուծումները պետք է փնտրեն Հայաստանում»:
Մանրամասն՝ տեսանյութում: