Արցախահայությանը և պատերազմի հետևանքով հաշմանդամություն ձեռք բերած անձանց ցուցաբերվող սոցիալական աջակցության ծրագրերի քանակը հասնում է մոտ 20-ի: Այս ծրագրերն ուղղված են հետպատերազմյան իրավիճակում առկա նոր սոցիալական խնդիրների կարգավորմանը: Արցախի ծրագրերի ուղիղ ֆինանսավորումն արդեն գերազանցում է 15 միլիարդը, այդ ծրագրերը շարունակվում են: Այս մասին «Առաջին լրատվական»-ի հետ զրույցում նշեց Աշխատանքի և սոցիալական հարցերի նախարար Մեսրոպ Առաքելյանը:
«Բոլոր նրանք, ովքեր մասնակցել են պատերազմին (թե՛զինծառայողները, թե՛ կամավորականները), վիրավորում են ստացել, բուժում են անցել և չունեն առաջին և երկրորդ խմբի հաշմանադամության կարգ (վերջիններիս սոցիալական երաշխիքները օրենքով սահմանված են), կստանան աջակցություն 500 հազար դրամի չափով: Այս շահառուների թիվը հասնում է մոտ 6000-ի: Հաշմանդամության կարգ ունեցողների թիվը չի գերազանցում 1000-ը, իսկ ամպուտացված անձանց թիվը չի գերազանցում 120-ը»,- նշեց Առաքելյանը:
Նրա խոսքով՝ պատերազմի հետևանքով սոցիալական խնդիրները շատացել են, աջակցության կարիք ունեցող շահառուների թիվը մեծացել է: «Իրականացնում ենք բարեփոխումներ՝ քաղաքացիներին ավելի արագ և որակով սպասարկելու նպատակով: Որոշակի խնդիրներ են առաջանում՝ կապված տեղեկատվական բազաների հետ, հաճախ քաղաքացիների կարգավիճակի արտացոլումը պատշաճ չէ, կան մարդիկ, որոնք 20 տարի բնակվել են Արցախում, բայց այնտեղ գրանցում չունեն, կամ կան երեխաներ, որոնք ծննդյան վկայական ունեն, բայց հաշվառված չեն բնակչության ռեգիստրում»,- նշեց նախարարը՝ հավելելով, որ, այնուամենայնիվ, շահառուների 90 տոկոսը ստացել է աջակցություն:
Առաքելյանը վստահեցրեց, որ փուլ առ փուլ լուծվում է կացարանների հարցը, մոտ 1000 բնակելի տան շինարարություն է ընթանում, դրանք նախկինում կիսակառույց են եղել, գյուղական համայնքներում որոշակի շինարարական աշխատանքներ են շարունակվում:
35 հազար արցախցի կացարան է կորցրել, քանի որ նրանց կացարանները մնացել են հակառակորդի վերահսկողության տակ, նրանցից մի քանի հազարը վերադարձել է Արցախ: Հայաստանում են մնացել մոտ 30 հազար արցախցի՝ մոտավորապես 10 հազար ընտանիք:
Աշխատանքի և սոցիալական հարցերի նախարարը հավաստիացրեց, որ արցախցիներին տրամադրվող սոցիալական աջակցության ծրագրերը հիմնականում իրականացվում են պետական միջոցներով, որոշ ծրագրերի իրականացման համար միջազգային դոնոր կազմակերպությունների կողմից տրամադրվել է փոքր աջակցություն:
Մանրամասն՝ տեսանյութում: