Ռուսաստանի անվտանգության խորհրդի նախագահի տեղակալ Դմիտրի Մեդվեդևի հայտարարությունը, թե՝ ԼՂ հարցի կարգավորումը պետք է քննարկել նաև Թուրքիայի հետ, արտակարգ և լիազոր դեսպան Արման Նավասարդյանը համարում է քաղաքական սայթաքում, որ թույլ է տվել Մեդվեդևը: «Ես գրեթե համոզված եմ, որ սա Կրեմլի առաջին դեմքերի դիրքորոշումը չէ, որովհետև այդ խնդրին Թուրքիային մոտ թողնելը լրիվ հակասում է և՛ տրամաբանությանը, և՛ այն բոլոր գործընթացներին, որ տեղի են ունեցել թե՛ ռուս-թուրքական հարաբերություններում, թե՛ ընդհանրապես տարածաշրջանում Լեռնային Ղարաբաղի հարցի կարգավորման ուղղությամբ: Եվ առաջին հերթին դա բախվում է ԵԱՀԿ Մինսկի խմբի համանախագահների դիրքորոշմանը»,- «Առաջին լրատվական»-ի հետ զրույցում ասաց Արման Նավասարդյանը:
Մեր զրուցակիցը բացառում է այդ հնարավորությունը, որովհետև դա ոչ միայն անընդունելի է Հայաստանի համար, այլև նույն Ռուսաստանի. «Այնպես որ, ես բացարձակապես չեմ ընկալում դա և կարծում եմ, որ Հայաստանը պաշտոնապես պետք է հանդես գա և առարկի ու բողոքարկի նման հայտարարությունը»:
Անդրադառնալով փետրվարի 1-12-ը Կարսում թուրք-ադրբեջանական զորավարժություններին՝ Արման Նավասարդյանը նկատեց. «Ցանկացած զորավարժություն ունի քաղաքական բովանդակություն: Չեմ կարծում, որ սա պատերազմի ազդանշան է, բայց հարավային մասում ունենալով հաջողություն, նկատի ունեմ Մեղրու ուղղությամբ նրանց պլանավորած ծրագրերը, որով փորձում են Հայաստանը կտրել իր սահմաններից և շրջափակել, հիմա սկսում են հյուսիսային մասում նման քայլի գնալ: Այդ ռազմական ուժի ցուցադրումը ուղղված է ոչ միայն Հայաստանի, այլև Ռուսաստանի դեմ. դա նախազգուշացման նման մի ազդանշան է առ այն, որ տեղի ունեցած 44-օրյա ռազմական գործողությունները չեն դադարում: Այնպես որ, ես այս զորավարժությունները համարում եմ չափազանց վտանգավոր, և կարծում եմ, որ այն առաջին հերթին ուղղված է Հայաստանի դեմ. սրանք մեր պետականության և տարածքային ամբողջականության դեմ վտանգ սպառնացող քայլեր են»:
Առավել մանրամասն՝ տեսանյութում: