Արդեն մեկ շաբաթ է՝ բողոքի ակցիաներ են տեղի ունենում Ախալքալաքում։ Ցուցարարները պահանջում են բացել վրաց-հայկական սահմանը, քանի որ սոցիալական լուրջ խնդիրներ են առաջացել։ Երկուշաբթի ջավախահայերը պատրաստվում են ավելի մեծ ակցիա իրականացնել, քանի որ Վրաստանի իշխանությունները որևէ հստակ պատասխան չեն տալիս։ Ցուցարարները հանդիպել են Ախալքալաքի քաղաքապետին: Վերջինս նշել է, որ այդ սահմանափակումները կապված են ժողովրդի առողջության հետ, պետության համար առաջնայինը ժողովրդի առողջությունն է։
«Առաջին լրատվական»-ի հետ զրույցում ցուցարարները նշեցին, որ ակցիաները շարունակական են լինելու այնքան ժամանակ, մինչև Վրաստանի իշխանությունները խնդրին լուծում չտան։
Ախալքալաքի բնակիչ Ռեմիկ Պողոսյանը «Առաջին լրատվական»-ի հետ զրույցում նշեց, որ Ջավախքում բնակիչները հիմնականում արտագնա աշխատանքի շնորհիվ են սոցիալական խնդիրները լուծում, և հիմա մեկ տարի է՝ չեն կարողացել մեկնել արտագնա աշխատանքի. «Եթե այս տարի չգնան, ջավախահայերը սովի կմատնվեն։ Իսկ գիտեք, որ հիմնականում ջավախահայերը Հայաստանով են գնում ՌԴ»,- հավելեց նա։
Մեր զրուցակիցը նաև նշեց, որ այս խնդիրը միայն Ջավախքում չէ, ամբողջ Վրաստանում է, սա ազատության սահմանափակում է, ինչը բացասական անդրադարձ է ունենում։
«Մեզ ասում են, որ եթե դրական դինամիկա լինի, եթե վարակվածները պակասեն, աստիճանաբար կմեղմացնեն սահմանափակումները»,- ասաց Ռեմիկ Պողոսյանը՝ հավելելով, որ Ջավախքում կովիդով վարակվածները համեմատաբար ավելի քիչ են, քան Վրաստանում։ Ջավախահայերը համաձայն են, որ թեստ հանձնեն, նոր կարողանան լքել երկիրը: «Կամ եթե հիմա այստեղից Հայաստան է գնում վարակված, դա ՀՀ խնդիրն է, Վրաստանի խնդիրը չէ»,- ասաց նա։
Ջավախքի բնակչության 80-90 տոկոսն արտագնա աշխատանքի է մեկնում, գյուղատնտեսությամբ զբաղվում են քչերը, հիմնականում կարտոֆիլ են աճեցնում, կարտոֆիլն էլ էժան է, չի վաճառվում, մարդիկ սոցիալական խնդիրների առաջ են կանգնած։ Ռեմիկ Պողոսյանը նշեց, որ Վրաստանի կառավարությունն իրականացնում է սոցիալական աջակցության ծրագրեր, սակայն տված գումարը չնչին է, որոշակի աջակցություն են ցույց տալիս բիզնեսով զբաղվողներին, որոնք տուժել են կովիդի հետևանքով։
Առաջիկայում մեծ ակցիաներ են իրականացվելու ոչ միայն Ջավախքում, այլև ամբողջ Վրաստանում։