«Վահան Բադասյանի անցած ճանապարհով, նրա բոլոր արժանիքներով հանդերձ՝ նման խոսքն ընդունելի չէ, հատկապես, երբ իրենք իրենց համարում են քաղաքականության մեջ: Ինձ համար ընդունելի չեն ատելության խոսքը, սպառնալիքի, ահաբեկչության, բռնության խոսքերը: Սակայն դրան հաջորդած գործողությունները համաչափ չէին. քրեական գործը հարուցվել է «իշխանության յուրացում» հոդվածով: Դե, բարև ձեզ. այսինքն՝ ցանկացած մեկը, որ հնչեցնում է խոսք, որ էսինչին պետք է ֆիզիկապես վերացնել, դա իշխանության յուրացո՞ւմ է»,- «Առաջին լրատվական»-ի հետ զրույցում ասաց իրավապաշտպան Նինա Կարապետյանցը՝ անդրադառնալով Վահան Բադասյանի հայտնի հայտարարությանը և դրան հաջորդած կալանավորմանը:
Նինա Կարապետյանցի կարծիքով՝ Վահան Բադասյանի վրա այդ ծանր հոդվածի ընտրությունը պատահական չէ. «Այսինքն՝ Ռոբերտ Քոչարյանի ու երկու բառ ասող Բադասյանի վրա նույն հոդվածն է դրված. լոգիկա չկա»:
Իրավապաշտպան Ժաննա Ալեքսանյանը ևս անընդունելի է համարում պարոն Բադասյանի հնչեցրած սպառնալիքները, որոնք, մեր զրուցակցի խոսքով, տոնայնությամբ այնքան էլ սպառնալիք չէին, որքան ուղղակի հայտարարություն: «16-ի կամ 17-ի մոտ ավելի շատ են սպառնալիքները՝ շենքեր գրավելու, քվեատուփերի մոտ արյուն հեղելու: 301-րդ հոդվածը, որով որակեցին նրա հայտարարությունը, ավելի անընդունելի է, քան Վահան Բադասյանի արածը: Սա ինձ հիշեցնում է պատերազմից հետո Նիկոլ Փաշինյանի «վրեժ, վրեժ» արտահայտությունը: Իհարկե, չգիտեմ, թե նա ինչ վրեժ ունի պարոն Բադասյանից լուծելու: Նրան պետք է ազատ արձակել, ծիծաղելի է ուղղակի նրա վրա այդ հոդվածը դնելը»:
Նինա Կարապետյանցն էլ հավելեց. «Ինչքան անբարոյական պետք է լինի մոտեցումը, որ կալանավորման հիմքերից մեկը նշված լինի մշտական բնակության վայր չունենալը: Լո՞ւրջ եք ասում. էդ մարդու մշտական բնակության վայրը Հադրութն էր, էդ մարդու տունը Հադրութում է, և այո, ինքը չունի մշտական բնակության վայր: Հայաստանում արդարադատությունը վաղուց մեռել է, ուղղակի մենք չենք համակերպվում: Ես առաջարկում եմ՝ եկեք հուղարկավորենք, անցնենք 0-ից կառուցելուն, որովհետև այլևս վեթինգն ու լյուստրացիան էլ չեն փրկելու»:
Առավել մանրամասն՝ տեսանյութում:
