Ճգնաժամն ավելի է խորացել, ազգովի ընկճախտի մեջ ենք ընկել: Այս մասին «Առաջին լրատվական»-ի հետ զրույցում ասաց օպերային երգչուհի, Հայաստանի վաստակավոր արտիստ Հասմիկ Պապյանը՝ հավելելով, որ այս իրավիճակից դուրս գալու ելք դեռևս չի տեսնում:
«Ամեն առավոտ արթնանում ես և վախով ես հետևում լրահոսին, որովհետև հնչում է ավելի ցավոտ որոշումների մասին, ինչ-որ գաղտնի բաներ են կատարվում մեր թիկունքում, պաշտոնյաներ են ազատվում, նշանակվում. սա ոտքի կանգնելու, երկիրը կառուցելու ծրագիր չէ: Ես չեմ տեսնում համախմբումը կարող ուժերի, որոնք քիչ թե շատ գաղափար ունեն այս վիճակից դուրս գալու վերաբերյալ»,- նշեց Պապյանը:
Հարցին, թե իշխանությունն այլևս ունակ չէ՞ որևէ բան փոխելու մեր երկրում, Պապյանը պատասխանեց, որ իշխանություն, որպես այդպիսին, չկա. «Չչգիտեմ՝ ով է մեզ ղեկավարում, ուր է գնում երկիրը: Ծրագիր չկա, և այն, ինչ կատարվեց, նույնիսկ դրա գիտակցումը չկա»:
Երկուսուկես տարի հնի ու նորի պայքար է, ավելի կարևոր չէ՞ր լինի, եթե իշխանությունը շարունակաբար քննադատելու փոխարեն իր կոնկրետ գործողություններով ապացուցեր, որ նախկին վարչակազմը ապաշնորհ էր: Այս հարցին ի պատասխան՝ Պապյանը նշեց. «Մենք հիմա ենք հասկանում, որ մեզ շրջապտույտի մեջ են գցել և շարունակ կերակրում են հների ու նորերի, «սևերի» ու «սպիտակների» միֆերով: Մենք սատանայական տեղապտույտի մեջ ենք հայտնվել, որից չենք կարողանում դուրս գալ: Ցո՛ւյց տվեք մեզ աշխատանք, ծրագիր, ցույց տվեք ճանապարհ»:
Մանրամասն՝ տեսանյութում: