Քաղաքական վերլուծական շրջանակներում չեն դադարում քննարկումները, թե Բայդենի վարչակազմի պայմաններում ինչ հնարավորություններ կան հայ-ամերիկյան հարաբերությունները զարգացնելու, ամրապնդելու համար։
Իրականում այս փուլում ի՞նչ նախադրյալներ, գուցե նաև խոչընդոտներ կան այդ հարաբերությունները զարգացնելու համար․ «Առաջին լրատվական»-ի հարցին միջազգայնագետ Սուրեն Սարգսյանը պատասխանեց․ «Նախ պետք է առանձնացնենք Բայդենի վարչակազմը նախորդ բոլոր վարչակազմերից, որովհետև, կարծես թե, այս վարչակազմը հայտնի է նրանով, որ քաջ տեղյակ է հայկական հարցերին վերաբերող խնդիրներին, հայկական համայնքի կողմից բարձրացվող խնդիրներին։ Բայդենը մինչ նախագահ ընտրվելը ութ տարի եղել է ԱՄՆ փոխնախագահ, մինչ այդ աշխատել է սենատոր և, կարելի է ասել, որ եղել է հայամետ սենատորներից մեկը։ Բայց իրավիճակը մի փոքր փոխվեց այն ժամանակ, երբ նա դարձավ Միացյալ Նահանգների փոխնախագահ։ Բարաք Օբաման խոստացել էր ճանաչել Հայոց ցեղասպանությունը, սակայն իր կառավարման ութ տարիների ընթացքում նա այդպես էլ չկատարեց իր խոստումը, ինչն առաջացրեց հայ համայնքի դժգոհությունը։
Ես կարծում եմ, որ Բայդենն ամենահարմար թեկնածուն է այն առումով, որ հայ-ամերիկյան հարաբերությունները կարող են ակտիվ զարգանալ, բայց, ցավոք սրտի, պետք է նկատենք, որ այս պահի դրությամբ որևէ ակտիվություն չի նկատվում որևիցե ուղղությամբ՝ դեռևս հեռախոսազրույց էլ չի եղել Հայաստանի և Միացյալ Նահանգների ղեկավարների միջև։ Բայդենը շատ ակտիվ հեռախոսազրույցներ է ունենում աշխարհի շատ երկրների առաջնորդների հետ, սակայն, ցավոք սրտի, Հայաստանի ղեկավարը դեռևս հեռախոսազրույց չի ունեցել Բայդենի հետ։ Ես հույս ունեմ, որ դրան էլ կհասնենք։ Ես կարծում եմ, որ, քանի որ Բայդենը մեզ լավ է ճանաչում, այսինքն՝ լավ գիտի հայկական խնդիրները, լավ կապեր ունի հայկական համայնքում, հույս ունեմ, որ կկարողանանք այս հնարավորությունն օգտագործել նաև հայանպաստ ինչ-ինչ գործընթացներ Վաշինգտոնում նախաձեռնելու և առաջ մղելու հարցում»։
Մանրամասները՝ տեսանյութում։
