Ջավախքում հունվարի 27-28-ը տեղի է ունեցել 3 ինքնասպանություն: Ինքնասպանություն գործածներից մեկը Վրաստանի խորհրդարանի նախկին պատգամավոր Հենզել Մկոյանի եղբոր կինն է: «Առաջին լրատվական»-ի հետ զրույցում Հենզել Մկոյանը նշեց, որ մյուս դեպքերի մասին ոչինչ չգիտի. «Մենք մեր ողբերգությամբ ենք զբաղված: Երևի լավ կյանքից չի էլի, որ մարդիկ չեն կարողանում Ռուսաստան գնալ, իրենց աշխատանքով ապահովել:
Իհարկե, մեր հարսի դեպքը սոցիալական խնդիրներով չի պայմանավորված, բայց մյուսները երևի դրանով են պայմանավորված»,- ասաց նախկին պատգամավորը: Եթե մյուս երկու ինքնասպանությունները, հավանական է, որ սոցիալական խնդիրներով էին պայմանավորված, Հենզել Մկոյանը պնդում է, որ իր եղբոր կնոջ հետ տեղի ունեցածը քաղաքական պատճառների հետևանք է:
Հիշեցնենք, որ 2020-ի մարտի 26-ին Ախալքալաքի «Գոլդ» սրճարանի մոտակայքում վեճ էր ծագել Ախալքալաքի նախկին ոստիկանապետ Սամվել Պետրոսյանի և պատգամավոր Հենզել Մկոյանի և կողմերի համակիրների միջև, հնչել էին կրակոցներ:
«Առաջին լրատվական»-ի հետ զրույցում Մկոյանը պատմել էր, թե ինչից է ծագել վեճը. «Իմ եղբայրը, որ խոշոր գործարար է, հարյուրավոր մարդիկ են իր մոտ աշխատում, իրենից 30 տարի փոքր տղան իրեն ասել է՝ փոշի հանեցիր վրաս: Ինքն էլ ասել է՝ ի՞նչ փոշի, սաղ քաղաքը փոշի է, որից հետո իրեն քարով խփել էր: Ամեն ինչ դրանից է սկսվել: Դրանից հետո այդ տղային չպատժեցին: Իսկ ամսի 26-ին 12-րդ դասարանցի իմ եղբոր տղան մեքենայով գնացել է, Սամվել Պետրոսյանը հայհոյել է: Տղային թվացել է, որ ուրիշին է հայհոյել, գնացել եկեղեցու կողքով պտտվել, նորից է եկել այդտեղով անցել, նա էլ թե՝ լավ ա եկար, հենց քեզ եմ ասում, ու նորից է հայհոյել:
Եղբորս տղան եկել և իմ տղաներին ու զարմիկներին ասել է՝ եկեք գնանք իր տղային տեսնենք, հարցնենք, թե ինչ են ուզում մեզնից: Գնացել, տղային են ասել, նա էլ հորն է ասել»։ Մկոյանի եղբոր որդուն 2020 թվականի մարտի 29-ին կալանավորել էին։ Նա մեղադրվում է հրազենի օգտագործման միջոցով կատարած խուլիգանության համար:
Հարցին՝ որքանո՞վ եղբոր կնոջ ինքնասպանությունը կարող էր կապ ունենալ նախկին պատգամավորի քաղաքական գործունեության հետ, նշեց, որ մի քանի հարց կա:
«Առաջինը, որ այդ նախկին ոստիկանապետը առաջին կրակողն ինքն էր: Երբ որ մարդը երեք անգամ ճակատային կրակում է, ինքն է մեղավոր, իսկ էն փոքրիկ երեխան, որ, ընդամենը տեսնելով, որ իր հորեղբոր վրա է կրակում, վերցրել է զենքն ու վազել է: Դրա համար 18 տարեկան տղային նստեցրին ու մորը թույլ չէին տալիս, որ գոնե հեռախոսով որդու հետ խոսի: Ինքը շատ ազդվեց դրանից: Ես այդ ժամանակ պատգամավոր էի: Միշտ գալիս լալիս էր, ասում էր՝ թողեք գոնե մի անգամ հետը խոսեմ: Դրանից մեկ տարի առաջ նրա մարմնի մեջ 6 սմ չափի կիստա էին տեսել և ասել էին, որ իրեն չի կարելի սթրեսներ ապրել, կարող է վատ բան դառնա: Մայրը շատ էր մտածում, որ որդին բանտում է նստած, ու չեն թողնում խոսել:
Երկրորդը՝ օգոստոսի 21-ին իր ամուսնու մեքենան պայթեցրին, հրաշքով կյանքը փրկվեց եղբորս: Դա էլ էր իր վրա ազդել: Հետո սկսվեցին քաղաքական հալածանքները, երբ ես իմ թեկնածությունը դրեցի: Սկսեցին ստուգումները իր ամուսնու ֆիրմաներում: Այդ ամենն անդրադարձավ, և այդ կենսուրախ կինը չդիմացավ»,- ասաց նա:
Այնուամենայնիվ, Հենզել Մկոյանը նշեց, որ նախկին ոստիկանապետի հետ լարվածությունն, արդեն մեկ տարի է, չկա:
