«Իրանի հետ կապված միֆեր էին ստեղծվել մեր ժողովրդի մոտ, ակնկալում էին, որ պատերազմի ժամանակ Իրանը հայանպաստ դիրքորոշում կցուցաբերի, կաջակցի մեզ, բայց Իրանը շատ լավ տնտեսական հարաբերություններ ունի և՛ Ադրբեջանի և Թուրքիայի հետ, և ամեն կերպ փորձում է խորացնել այդ հարաբերությունները: Ադրբեջանի հետ Իրանի ապրանքաշրջանառությունն ավելի մեծ է, քան Հայաստանի հետ, և նման պայմաններում այդքան էլ ողջամիտ չէ, որ Իրանը պետք է պրոհայկական դիրքորոշում որդեգրի: Իրանն ունի իր սթափ, ռացիոնալ հաշվարկները և դրանցով էլ առաջ է շարժվում»,- այս մասին «Իրանի ԱԳ նախարարի այցի տարածաշրջանային խորապատկերը» թեմայով առցանց քննարկման ժամանակ ասաց իրանագետ Արմեն Վարդանյանը: