Եվրամիությունը ողջունում է Ռուսաստանի և ԱՄՆ-ի կողմից Ռազմավարական հարձակողական սպառազինությունների հետագա կրճատման և սահմանափակման միջոցների մասին պայմանագրի (ՌՀՍՊ, ոչ պաշտոնական անվանումը՝ ՌՀՍ-3) երկարաձգումը, ինչը կարեւորագույն ավանդ է միջազգային անվտանգության բնագավառում: Հունվարի 28-ին այդ մասին ՏԱՍՍ-ին հայտնել է Եվրամիության արտաքին քաղաքական ծառայության ներկայացուցիչ Պետեր Ստանոն:
«Մենք ողջունում ենք ԱՄՆ-ի եւ Ռուսաստանի համաձայնությունը ՌՀՍՊ-ի գործողության ժամկետը ևս հինգ տարով երկարաձգելու մասին: Դա կարևորագույն ավանդ Է միջազգային եւ եվրոպական անվտանգության բնագավառում:
Պայմանագիրը սահմանափակում է ռազմավարական մրցակցությունը և բարձրացնում է ռազմավարական կայունությունը միջուկային զենք ունեցող երկու խոշորագույն պետությունների միջև կանխատեսելիության և փոխադարձ վստահության բարձրացման հաշվին»,- նշել է նա:
Ստանոն ընդգծել է, որ «ԱՄՆ-ի և Ռուսաստանի Դաշնության միջև երկխոսությունը կարևոր քայլ է ապագա նոր պայմանագրի և սպառազինությունների նկատմամբ վերահսկողության պոտենցիալ նոր մեխանիզմների համար՝ ռազմավարական կայունության պահպանման նպատակով»: «Մենք հիշեցնում ենք, որ ամենամեծ միջուկային զինանոցներ ունեցող երկու պետություններն առանձնահատուկ պատասխանատվություն են կրում սպառազինությունների եւ միջուկային զինաթափման նկատմամբ վերահսկողության բնագավառում եւ պետք Է ձգտեն իերնց զինանոցների հետագա կրճատման, ներառյալ ռազմավարական և ոչ ռազմավարական, ծավալված և ոչ ծավալված միջուկային սպառազինությունները»,- հավելել է նա: