ԵԱՀԿ Մինսկի խմբի ռուսաստանցի, ամերիկացի և ֆրանսիացի համանախագահներն այս շաբաթ հանդիպելու են Լեհաստանում: Այս մասին Mediamax-ը տեղեկացել է Վիեննայում ԵԱՀԿ քարտուղարության աղբյուրից:
Խորհրդակցությունների ընթացքում միջնորդները քննարկելու են իրենց անելիքները հետպատերազմական շրջանում, ինչպես նաև առաջիկա այցը տարածաշրջան:
Քաղաքագետ Անդրիաս Ղուկասյանի կարծիքով՝ Մինսկի խմբի համանախագահների հանդիպումների բացակայությունն այս ընթացքում պայմանավորված էր Միացյալ Նահանգներում իշխանափոխության գործընթացով: «Ներկա դրությամբ այդ ժամանակահատվածն անցել է։ ԱՄՆ-ն ունի ձևավորած նոր ղեկավար թիմ։ Ունի նաև դիրքորոշում Հարավային Կովկասում իր քաղաքականության վերաբերյալ։ Մենք գիտենք, որ ԱՄՆ-ի, Ֆրանսիայի ու Հունաստանի միջև կա հուշագիր՝ այդ տարածաշրջանում Թուրքիայի գործողությունների հետ կապված։ Այս ամենը դառնում է մի քաղաքականություն, որը մեզ վերաբերում է այնքանով, որքանով մենք ակնկալում ենք ճնշում Ադրբեջանի ու Թուրքիայի վրա, որպեսզի վերականգնվի արդարությունը Արցախի կարգավորման հարցում»,- «Առաջին լրատվական»-ի հետ զրույցում ասաց նա։
Ղուկասյանի դիտարկմամբ՝ Ռուսաստանը դեռևս դեկտեմբերի 3-ին միացավ երեք արտգործնախարարների հայտարարությանը և այդ հայտարարության տեսքով իր համաձայնությունը ցույց տվեց Մինսկի խմբի ֆորմատի գործունեության շարունակությանը. «Ռուսաստանի համար ԵԱՀԿ գործընթացը կարևոր նշանակություն ունի, և Ռուսաստանը պատրաստ չէ այդ ֆորմատը տապալելու։ Սա ակնհայտ էր, ու նորություն չէ, որ Ռուսաստանը նույնպես շարունակում է իր մասնակցությունը Մինսկի խմբի շարքերում։ Այլ հարց է, որ Ռուսաստանն իր տեսլականը ներկայացրեց։ Ըստ իրեն՝ Մինսկի խումբը պետք է երկրորդական հումանիտար դեր խաղար, իսկ առաջնային դերակատարությունը իրենք տեսնում էին Ադրբեջանի ու Հայաստանի միջև կնքված այդ եռակողմ որոշման կատարման մեջ։ Բայց տեսանք, որ Ֆրանսիան ու ԱՄՆ-ը հրաժարվեցին ընդունել այդ դիրքորոշումը և կարծում են, որ Արցախի կարգավիճակը պետք է շուտափույթ լուծում ստանա, և միայն այդ դեպքում խնդիրը կարող է ունենալ երկարատև լուծում, կամ խաղաղությունը կունենա երկարատև հենարան»։
Ըստ մեր զրուցակցի՝ ԱՄՆ-ն ու Ֆրանսիան նաև հետևողական են Արցախի տարածքային ամբողջականությունը վերականգնելու հարցում. «Այսինքն՝ կարծում են, որ Ադրբեջանը պետք է դուրս բերի իր Զինված ուժերը Արցախի տարածքից։ Այդ ամենը իհարկե իր ազդեցությունը կունենա Ադրբեջանի վրա, և մենք շուտով ականատես կլինենք դրա հետևանքներին»։
Արդյոք Մինսկի խումբը կշարունակի՞ գործել այն տրամաբանությամբ, որով գործում էր նախքան պատերազմը՝ հարցին ի պատասխան քաղաքագետն ասաց. «Ըստ հայտարարածի՝ այդ տրամաբանությունը չի փոխվել։ Այսինքն՝ Մինսկի խումբը համարում է, որ Արցախի կարգավիճակի հարցը պետք է լուծվի արցախահայության հանրաքվեի միջոցով, և որ տարածաշրջան պետք է մտնեն միջազգային խաղաղարար ուժեր, և պետք է լինի միջանցք, որը կապելու է Արցախը Հայաստանի հետ։ Եվ այդ միջանցքը պետք է ունենա այն նույն կարգավիճակը, ինչը և կորոշվի Արցախի համար։ Դա մեզ համար շատ կարևոր է։ Այդ բոլոր դրույթները էապես փոխում են իրավիճակը պատերազմից հետո և լրացուցիչ անվտանգության երաշխիքներ են ստեղծում արցախահայության համար։ Գիտենք, որ այսօր այդպիսի երաշխիքներ չկան, և անվտանգության խնդիրը շատ լուրջ է։ Թեպետ ռուս խաղաղապահներն այնտեղ ներկա են՝ մարդիկ իրենց անվտանգ չեն զգում»։
