ԱՄՆ նախագահ Ջո Բայդենը զանգահարել է Ռուսաստանի առաջնորդ Վլադիմիր Պուտինին «հողը շոշափելու» համար, գրում է ամերիկյան The National Interest պարբերականը:
Ըստ պարբերականի, Կրեմլն ու Սպիտակ տունը տարբեր տեղեկություններ են ներկայացրել երկու նախագահների զրույցի վերաբերյալ:
Վաշինգտոնը թվարկում է Մոսկվայի դեմ ունեցած «բողոքներն ու պահանջները», իսկ Կրեմլը հաղորդում է կորոնավիրուսի համավարակի և Իրանի հետ միջուկային համաձայնագրի հեռանկարների վերաբերյալ քննարկման մասին:
Հոդվածի հեղինակի խոսքով, Ռուսաստանը հնարավոր փոխզիջումների և համաձայնագրերի գործնական քննարկումներ է ակնկալում: Իսկ ԱՄՆ նոր վարչակազմն, իր հերթին, հնարավորություն է տեսնում նման բանակցությունների միջոցով նախապայմաններ ներկայացնել Մոսկվային՝ նախքան երկկողմ հարաբերությունների կարգավորումը:
Պարբերականը նշում է, որ Պուտինի և Բայդենի շփման միակ արդյունքը ՌՀՍԿ պայմանագիրը երկարաձգելու որոշումն է, որն արդեն դրական ազդանշան է Ռուսաստանի համար:
Երկու առաջնորդների առաջին հեռախոսազրույցը տեղի է ունեցել հունվարի 26-ին:
