Իրանի ԱԳ նախարար Զարիֆի տարածաշրջանային այցը՝ նախ Բաքու, ապա Հայաստան, և Բաքվում նրա արած քաղաքական հայտարարությունները բուռն քննադատության առիթ են հանդիսացել:
Թեմայի շուրջ «Առաջին լրատվական»-ը զրուցել է քաղաքագետ Սուրեն Պետրոսյանի և վերլուծաբան Արշալույս Մղդեսյանի հետ:
Սուրեն Պետրոսյանն ընդգծեց, որ Զարիֆի՝ Հայաստան կատարած այցը կրում է զուտ արարողակարգային բնույթ:
«Եթե ժամանակին համարվում էր անվտանգության երաշխավոր, ապա այսօր ակնհայտ է, որ տարածաշրջանում Հայաստանի Հանրապետությունը սուբյեկտ չէ: Հիմնական կարգավորումները կամ ոչ ֆորմալ մակարդակով բանակցությունները տեղի են ունենում մեր ռազմավարական դաշնակցի և Թուրքիայի, նաև Ադրբեջանի հետ, բայց ոչ մեզ հետ: Ըստ էության՝ հունվարի 11-ին Մոսկվայում կայացած եռակողմ հանդիպումը նույնպես կրում էր արարողակարգային բնույթ»,- նշեց Պետրոսյանը:
Քաղաքագետի դիտարկմամբ՝ զայրացնող է այն հանգամանքը, որ մեր արտգործնախարարն արդեն որերորդ անգամ խոսք է ասում, որի մեջ որևէ ակնարկ անգամ չկա մեր տարածքների օկուպացման մասին: «Եթե խնդիրն այն է, որ մենք դրանով ուզում ենք փորձել ամեն գնով խաղաղություն ունենալ և տնտեսական հրաշք խոստանալ, դա մեծագույն միֆ է: Իշխանության գործողությունները որևէ աղերս չունեն իրականության հետ, կարծեք թե ապրում են այլ իրականությունում»:
Արշալույս Մղդեսյանի դիտարկմամբ՝ Իրանի ԱԳ նախարար Զարիֆի տարածաշրջանային այցը կարևոր է: «Տարածաշրջանային գերտերության արտգործնախարարը մինչ Հայաստան գալը եղել է Մոսկվայում, Բաքվում, գուցե լինի նաև Անկարայում: Կարծեք թե սա տարածաշրջանում խաղաղության հաստատման ռուսական պրոյեկտին ինչ-որ առումով աջակցելու տարբերակ է: Եվ Իրանը կարծեք թե դեմ չէ նաև Թուրքիայի առաջարկած տարածաշրջանային «Վեցի հարթակի» ձևավորմանը, որտեղ հավաքվելու են Հայաստանը, Ռուսաստանը, Իրանը, Թուրքիան, Ադրբեջանը, Վրաստանը և փորձելու են լուծել տարածաշրջանային հարցեր:
Իրանի արտգործնախարարի այցը, կարծում եմ, հենց տարածաշրջանային գործընթացներով է պայմանավորված, Իրանը նաև ճանապարհների ապաշրջափակման հեռանկարի հետ կապված՝ փորձում է շոշափել կողմերի տրամադրությունները, և հասկանալ՝ ապաշրջափակումը կշրջանցի՞ Իրանի շահերը, թե՞ հաշվի կառնի: Ներկայացված տարբերակով Իրանի շահերը հաշվի չեն առնվում»,- նշեց վերլուծաբանը:
Մանրամասն՝ տեսանյութում: