Առանց վարչապետի հրաժարականի Ազգային ժողովը լուծարելու ու արտահերթ ընտրություններ նշանակելու գաղափարն արդեն իշխող «Իմ քայլը» խմբակցության օրակարգում է։
Այս գաղափարն իրագործելու համար դարձյալ պետք է փոխեն Սահմանադրությունը։ Սահմանադրական այս փոփոխության համար էլ անհրաժեշտ է 88 պատգամավորի ձայն։ Իսկ այս պահին իշխող ուժի շարքերը նոսրացել են, 5 պատգամավոր լքել է խմբակցությունը: Եվ այս սցենարի պարագայում անհրաժեշտ կլինեն ընդդիմության ձայները: Որքանով սա կլինի ճգնաժամային այս իրավիճակից դուրս գալու տարբերակ և ինչպիսին կլինի, ըստ Ձեզ, անկախ պատգամավորների ընտրությունը: Թեմայի շուրջ «Առաջին լրատվական»-ը զրուցել է ԱԺ պատգամավոր Արման Բաբաջանյանի հետ:
Վարչապետի հետ դեկտեմբերի 30-ին կայացած հանդիպմանը ես նշել եմ, որ երկիրը պետք է նախապատրաստել արտահերթ ընտրությունների, և հիմնարար բարեփոխումների ճանապարահային քարտեզ եմ ներկայացրել, առաջարկել եմ գործողությունների շղթա, որը երկիրը անցնցում կպահի ցանկացած պահի արտահերթ ընտրություններ անցկացնելիս: Այդ հարցը քննարկելուց հետո ևս մեկ անգամ վարչապետի հետ հանդիպման հնարավորություն ենք ունեցել՝ մասնագիտական քննարկում իրականացնելու, և դիտարկել ենք նաև ԱԺ-ի կողմից սահմանադրական փոփոխություններ իրականացնելու հեռանկարը: Այո, այսօր բավարար չեն իշխող կուսակցության ձայները, և ես պատրաստ եմ աջակցել այս նախաձեռնությանը, որովհետև «Հանուն հանրապետություն» կուսակցության համար ևս արտահերթ ընտրություններ անցկացնելը ընդունելի ռազմավարություն է ստեղծված իրավիճակից դուրս գալու համար, բայց մենք ունենք նախապայման՝ դատաիրավական բարեփոխումներ պիտի իրականացվեն, փոփոխություններ պետք է կատարվեն Դատական օրենսգրքում»:
Բաբաջանյանի դիտարկմամբ՝ ակնհայտ է, որ արտահերթ ընտրությունները նախկինների համար լինելու են կենաց-մահու կռիվ: «Մենք տեսնում ենք, թե ինչպիսի հռետորաբանություն է կիրառվում «փրկիչների» առաջնորդի կողմից, նրանք ոչնչի առջև չեն կանգնելու, նրանց համար չկան կարմիր գծեր… Մենք ունենք պետության, պետականության դեմ պատերազմ հայտարարած դատական համակարգ. այս համակարգո՞վ պետք է գնալ ընտրությունների, ո՛չ»,- նշեց պատգամավոր՝ հավելելով, որ նախաձեռնությանը կաջակցի, եթե այս խնդիրը լուծելու ուղղությամբ իշխանությունները գործուն քայլեր կատարեն:
Բաբաջանյանը նաև ընդգծեց, որ իրավապահները պետք է քրեաիրավական գնահատկան տան Վազգեն Մանուկյանի հայտարարությանը, որ եթե սահմանադրական ճանապարհով Փաշինյանը չհեռանա, պետք է ապստամբություն անել: Պատգամավորը նաև նշեց, որ երբ հանդիպում է ունեցել Նաիրի Հունանյանի հետ, նա նշել է, որ Հոկտեմբերի 27-ին նախորդած ժամանակահատվածում Վազգեն Մանուկյանի հետ հանդիպումներ է ունեցել, և Վազգեն Մանուկյանը, ըստ էության, ասել է նույն բանը, ինչ որ նախօրեին հայտարարել է Արարատում, նա ասել է, որ եթե չլինի Վազգեն Սարգսյանը, Հայաստանի բոլոր խնդիրները կլուծվեն, և քանի դեռ նա ողջ է, այդ խնդիրները չեն լուծվի»:
Մանրամասն՝ տեսանյութում:
