Վրաստանի իշխանությունները հույս ունեն մոտ ժամանակներս բարձրացնել Ռուսաստանի հետ ցամաքային սահմանի բացման հարցը, եթե կորոնավիրուսի հետ կապված համաճարակային իրավիճակը թույլ տա: Հունվարի 27-ին այդ մասին ՏԱՍՍ-ին հայտնել է ՌԴ-ի հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեն:
«Դուք գիտեք՝ Ռուսաստանի հետ սահմանի բացումը կախված է համաճարակային իրավիճակից: Հենց դա է խնդիրը: Հուսով եմ, որ կորոնավիրուսի հետ կապված իրավիճակը մոտ ապագայում կկայունանա մեր երկրներում, և մենք կկարողանանք բարձրացնել սահմանի բացման հարցը»,- ասել է Աբաշիձեն:
Վրաստանի դիվանագետը հավելել է, որ առաջին եռամսյակում ինքը պլանավորում է առցանց հանդիպում անցկացնել Դաշնության խորհրդի անդամ Գրիգորի Կարասինի հետ՝ չբացառելով, որ կքննարկի նաև սահմանի բացման հնարավորությունը: Այսօր Վրաստանի և Ռուսաստանի միջև անցման միակ սահմանային կետը՝ «Կազբեկ–Վերին Լարս»-ը, 2020 թվականի մարտից փակ է նոր կորոնավիրուսի համավարակի պատճառով: Վրաստանի Զբոսաշրջության ազգային վարչության տվյալներով 2020 թվականին ՌԴ-ի քաղաքացիները կատարել են ավելի քան 209 հազար այց հանրապետություն, ինչը 85,8 տոկոսով պակաս է, քան 2019 թվականին: Վրաստանը ՌԴ-ի հետ կանոնավոր ավիակապ չունի: Այն ընդհատվել է 2019 թվականի հուլիսից՝ ռուսական կողմի նախաձեռնությամբ: