ԱԺ-ն որոշել է արտահերթ ընտրություններ անցկացնելու ուղիներ փնտրել: Ներքաղաքական օրակարգը կանգ է առել արտահերթ ընտրություններ անել-չանելու երկընտրանքի առջև:
Թեմայի շուրջ «Առաջին լրատվական»-ի հետ քննարկման ժամանակ վերլուծաբան Գոռ Մադոյանը նշեց, որ քաղաքական ուժերը և քաղաքացիական հասարակության ներկայացուցիչները հասկացել են, որ մեր հասարակության մեջ ապատիայի տարրեր կան, և ընտրական գործընթացների դեպքում հնարավոր է ակտիվություն չլինի, բացի դրանից՝ կասկածներ կան նաև իշխանական ռեսուրսների հետ կապված: Վերլուծաբանի դիտարկմամբ՝ արտահերթ ընտրություններ անցկացնելն առաջնային է այն ուժերի համար, որոնց նպատակը Հայաստանի քաղաքական կյանքի վերբեռնումն է, ոչ թե քաղաքական ճգնաժամի խորացումը: Մադոյանի կարծիքով՝ մեր հասարակությունը դեռևս պատրաստ չէ արտահերթ խորհրդարանական ընտրությունների:
«Հանուն հանրապետության» ԺՊԴԿ անդամ Արտաշես Խալաթյանը կարծիք հայտնեց, որ ընտրությունների գնալը, ընդհակառակն, կակտիվացնի հասարակական-քաղաքական կյանքը և հասարակությանը թմբիրից դուրս գալու համար լավ խթան կլինի:
«Լեգիտիմ իշխանություն-ոչ լեգիտիմ իշխանություն արհեստական բանավեճին պետք է վերջ դրվի, և հասարակությանը պետք է թույլ տալ անցնել պետականաշինության խաղաղ փուլի, թեև, իհարկե, վերքերը դեռ երկար ժամանակ չեն ամոքվի»,- նշեց Խալաթյանը՝ հավելելով, որ քաղաքական դաշտը լցված է արհեստական օրակարգերով, որը ջլատում է հանրային, առանց այն էլ համեստ, ռեսուրսները: Խալաթյանի խոսքով՝ պետք է գնալ ընտրությունների, և թող հաղթի ուժեղագույնը:
«Քաղաքացու որոշում» կուսակցության գործադիր մարմնի անդամ Վլադ Հովհաննիսյանը կարծիք հայտնեց, որ պետք է գնալ արտահերթ ընտրությունների, սակայն կարևոր է, թե ինչ իրավիճակում ու ինչ կառավարող ուժով ենք գնում. «Անհրաժեշտ է, որ ընտրություններն անցկացվեն համերաշխության մթնոլորտում, որն այս պահին չկա, և չեմ բացառում նախընտրական փուլում ծեծուջարդերը, ընդհուպ մինչ արյունահեղություն»:
Հովհաննիսյանի խոսքով՝ գործող կառավարությունը պետք է հրաժարական տար իմպիչմենթի գործընթացով, նոր, ժամանակավոր կառավարություն պետք է ձևավորվեր, որը կստեղծեր համերաշխության մթնոլորտ և կհրաժարվեր մասնակցել արտահերթ ընտրություններին:
Արտաշես Խալաթյանն ընդգծեց, որ այսօր առկա է ռեալ մարտավարական մի խնդիր՝ ապահովել իշխանության ժողովրդական հաջորդայնությունը:
Մանրամասն՝ տեսանյութում: