Երևանի պետական համալսարանի հոգաբարձուների խորհուրդը ուրբաթ օրը՝ ժամը 11։00-ին, կգումարի հոգաբարձուների խորհրդի նիստ։ Հիշեցնենք, որ նոյեմբերից մինչ օրս հոգաբարձուների խորհուրդը նախագահ չունի, քանի որ խորհրդի նախագահ Գևորգ Մուրադյանը հրաժարական է տվել։
Նիստի օրակարգում ընդգրկվել է երկու հարց՝ խորհրդի նախագահի ընտրությունը և աշխատակարգում փոփոխություններ անելու հարցը։ Խորհրդի կազմն ամբողջական է՝ բացառությամբ նախագահի։ Խորհրդի անդամներից ընտրվում է նախագահ, սակայն խորհրդի անդամ դասախոսները և ուսանողները իրավունք չունեն ընտրվելու, այսինքն՝ ընտրվելու է կամ կառավարության ցուցակից, կամ ԿԳՄՍՆ-ի ցուցակից։
«Առաջին լրատվական»-ի տեղեկություններով՝ խորհրդի նախագահ է ընտրվելու էկոնոմիկայի նախարար Վահան Քերոբյանի եղբայրը՝ Ավետիք Քերոբյանը։ Խորհրդի նախագահի պաշտոնում նրա ընտրությունը, ըստ ամենայնի, դժգոհություն չի առաջացնի։ «Եթե մարդը որոշել է աշխատել, համալսարանի խնդիրները լուծել՝ խնդիր չի առաջանա։ Գևորգ Մուրադյանը սկզբում միաձայն ընտրվեց նախագահ, հետո խնդիրներ սկսեցին առաջանալ, քանի որ նա նախարարի կամակատարն էր դարձել, դրա համար էլ իր հետ խնդիր էր առաջացել»,- նշեց համալսարանի մեր աղբյուրը։