ՌԴ նախագահ Վլադիմիր Պուտինն առաջին անգամ մեկնաբանել է Ալեքսեյ Նավալնիի հակակոռուպցիոն հիմնադրամի հետաքննությունը Գելենջիկի մոտակայքում գտնվող պալատի վերաբերյալ: Ուսանողների հետ հանդիպմանը Պուտինը պատասխանել է հետաքննության վերաբերյալ հարցին: «Ես այդ ֆիլմը չեմ դիտել պարզապես այդպիսի տեղեկատվություն դիտելու համար ազատ ժամանակ չունենալու պատճառով: Բայց ես թերթել եմ օգնականների բերած կադրերը:
Ես ուզում եմ միանգամից պատասխանել ձեր հարցին. Ոչինչ, ինչ որ այնտեղ նշված է որպես իմ սեփականություն, ոչ ինձ, ոչ էլ իմ մերձավոր ազգականներին չեն պատկանում և երբեք չեն պատկանել: Եր-բեք», – ասել է Պուտինը: Նա հետաքննությունն անվանել է «կոմպիլյացիա»:
Հունվարի 19-ին Հակակոռուպցիոն հիմնադրամը հրապարակեց հետաքննություն Վլադիմիր Պուտինի՝ Գելենջիկի մոտ գտնվող, այսպես կոչված, պալատի վերաբերյալ: Հետաքննությունը հրապարակվել է Խիմկիի դատարանի կողմից ՖԲԿ-ի հիմնադիր Ալեքսեյ Նավալնուն 30 օրով նախնական կալանքի կենտրոն ուղարկելուց մեկ օր անց, երբ վերջինս Գերմանիայից Ռուսաստան վերադարձավ: Հետաքննությունը կատարվել է նախքան Նավալնիին ձերբակալելը: Այն ներառում է մոտ 2 ժամ տևողությամբ փաստագրական ֆիլմ, որին մասնակցում է ինքը՝ Նավալնին:
«Պուտինի պալատը», որը հայտնի է նաև որպես Իդոկոպաս հրվանդանի նստավայր, կառուցվել է 2005-2010 թվականներին Սև ծովի ափին՝ Գելենջիկի մոտ: Այն մասին, որ պալատը կառուցվել է Ռուսաստանի նախագահի համար, հայտարարել էր 2010-ին գործարար Սերգեյ Կոլեսնիկովը: