Հակակոռուպցիոն և վերաքննիչ հակակոռուպցիոն դատարաններ ստեղծելու մասին օրենսդրական փաթեթը առաջին ընթերցմամբ ընդունվեց Ազգային ժողովի կողմից հունվարի 19-ի նիստում։
Մասնագիտացված հակակոռուպցիոն դատարանը կունենա առնվազն 25 դատավոր, որից 20-ը կքննեն կոռուպցիոն հանցագործությունների վերաբերյալ գործերը, իսկ 5-ը՝ նաև «Ապօրինի ծագում ունեցող գույքի բռնագանձման մասին» օրենքի հիման վրա գույքի բռնագանձման հայցերով հարուցված քաղաքացիական գործերը: Վերաքննիչ հակակոռուպցիոն դատարանը կունենա առնվազն տասը դատավոր։ Արդարադատության նախարարը տեղեկացրեց, որ նշանակվող բոլոր դատավորներն անցնելու են բարեվարքության ստուգում կամ, ինչպես հանրության մեջ ընդունված է ասել, վեթինգ։ «Արդյունքում կմեծանա գործերի քննության արագությունը, կբարձրանա կոռուպցիոն գործերով մասնագիտացված քննության արդյունավետությունը»,- վստահ է նախարարը։ Նախկին դատավոր, «Անկախ դատավոր» ՀԿ նախագահ Պարգև Օհանյանն «Առաջին լրատվական»-ի հետ զրույցում նկատեց, որ «բարոյական խոչընդոտ» կա նոր դատավորների վեթինգի իրականացման հարցում։ Բարեվարքության ստուգում, վեթինգ իրականացնելու են նրանք, ովքեր իրենք վեթինք չեն անցել։ «Այդ իմաստով, այո, խնդիր կա, բայց թող իրականացնեն, տեսնենք՝ ինչ կլինի»,- ասաց Օհանյանը։ Բացի դրանից, Օհանյանի խոսքերով, մեծ հարց է՝ իրավունք կա՞ հակակոռուպցիոն վերաքննիչ դատարան ստեղծել, թե՞ ոչ, որովհետև Վերաքննիչ դատարանները սահմանված են Սահմանադրությամբ. «Ես որքան հիշում եմ՝ Սահմանադրության մեջ չկա բաց տող, որ նոր վերաքննիչ ստեղծես։ Առաջին ատյանի դեպքում պարզ է, Սահմանադրությամբ կա մասնագիտացված դատարաններ ստեղծելու իրավունք, որը չի կարելի ասել Վերաքննիչ դատարանների դեպքում։ Տրամաբանական կլիներ, որ հակակոռուպցիոն առաջին ատյանի դատարան ստեղծվեր, բայց այն գործերը, որոնք քրեական են՝ քննի վերաքննիչ քրեականը, իսկ քաղաքացիական գործերը՝ քաղաքացիական վերաքննիչը։ Կրկնում եմ, ոնց որ թե չկա հակակոռուպցիոն վերաքննիչ դատարան ստեղծելու հնարավորություն»,- ընդգծեց Օհանյանը։ Ինչ վերաբերում է մասնագիտական դատարաններ ստեղծելուն առհասարակ, ապա նախկին դատավորն ասաց, որ առհասարակ մասնագիտացված դատարանները լավ բան են, պետք է որ էֆեկտ ապահովեն։ Այլ հարց է, թե դրանք ինչպես կգործեն Հայաստանում, ինչքանով ապաքաղաքականացված կլինեն ու անկախ կգործեն գործադիրից։ Իրավապաշտպան Նինա Կարապետյանցը ևս մեզ հետ զրույցում նկատեց. «Շատ վիճահարույց է, որ հակակաոռուպցիոն դատարանի և հակակոռուպցիոն վերաքննիչ դատարանների դատարավորներին վեթինգ են իրականացնելու մարդիկ, որոնց անձը խիստ վիճահարույց է։ «Այդտեղ նույնիսկ տրամաբանություն չկա։ Բացի դա ես բարեվարքության ստուգումը վեթինգ չեմ համարում։ Վեթինգը շատ ավելի խորքային գործընթաց է իրենից ենթադրում։ Զարմանալի չէ, որ արդարադատության նախարարը պարբերաբար նման մանիպուլիացիաների է դիմում, թե ժողովրդի ուզած վեթինգը իրականացվելու է և այլն։ Կրկնում եմ, դա վեթինգ չէ և պետք չէ դրանով հրճվել։ Բայց արդարադատության նախարարը հաճախ է նման բաներից հրճվում, ուրախանում, իսկ վերջում պարզվում է, որ բոլորովին այլ բան է ստացվել»,-ասաց իրավապաշտպանը։ Միևնույն ժամանակ, մեր զրուցակցի խոսքով, խիստ խնդրահարույց է նաև հակակառուպցիոն դատարանների ստեղծումն ինքնին։ Կարապետյանցը դա համարում է իրավիճակային լուծում.«Հեղափոխությունից 2.5 տարի անց մենք պետք է ունենային վեթինգի ենթարկված, ամբողջությամբ բարեփոխված նոր դատական համակարգ, ոչ թե եղած խնդիրների պարագայում գնայինք ինչ որ իրավիճակային լուծումների։ Ես չեմ համարում, որ հակակոռուպցիոն դատարանների ստեղծումով ինչ որ բան կփոխվի»,-եզրափակեց իրավապաշտպանը։
|