ՀՖՖ-ի արտահերթ ժողով նախաձեռնությամբ հանդես եկող ակումբներն այսօր հայտարարություն են տարածել։ Այն զետեղվել է ՀՖՖ Արտահերթ Ժողով» (https://m.facebook.com/ffaExtraordinary/?device_id=3dab30be-2b7f-435f-ae49-a07ebf80dbc0&_rdr) Ֆեյսբուքյան էջում։ Հայտարարութան մեջ մասնավորապես ասված է․
Ի պատասխան հունվարի 22-ին ՀՖՖ պաշտոնական կայքում հրապարակված «ՀՖՖ պաշտոնական հայտարարությանը»՝ հայտնում ենք, որ արտահերթ ժողովի նախաձեռնությամբ հանդես եկող ակումբները պահպանել են ՀՖՖ կանոնադրության կետերը։ Եվ կոչ ենք անում ՀՖՖ գործադիր մարմին, դրսևորել կառուցողական կեցվածք և միանալ ՀՖՖ անդամ կազմակերպությունների նախաձեռնությանը՝ ուղղված հայկական ֆուտբոլի առողջացմանը և «ղումարի» մաքրմանը: Հարց, որին ՀՖՖ պատկան մարմինները, արդեն կարծես թե միտումնավոր, չեն ենթարկում պատշաճ վերլուծության և չեն տալիս համարժեք գնահատական՝ հետագայում նման անընդունելի հետևանքներից խուսափելու համար:
Նաև տեղեկացնենք, որ երբ դիմել ենք ՀՖՖ գործադիր մարմնին՝ սույն թվականի հունվարի 20-ին ՀՖՖ արտահերթ ժողով անցկացնելու առաջարկով, չենք ստացել և՛ ոչ մի պաշտոնական արձագանք: Այդ նախաձեռնության մասին նույնիսկ չեն տեղեկացվել ՀՖՖ գործադիր կոմիտեի անդամները, չեն տեղեկացվել նաև ՀՖՖ բոլոր անդամ կազմակերպությունները:
Այսպիսի արհամարհանքը ընդունելով որպես Արտահերթ ժողով անցկացնելու հրաժարվում՝ արդեն հունվարի 21-ից ձեռնարկել ենք անդամների նախաձեռնությամբ Արտահերթ ժողով հրավիրելու գործընթաց՝ իրացնելով ՀՖՖ Կանոնադրությամբ սահմանված մեր իրավունքները:
Ինչպես նաև կոչ ենք անում ՀՖՖ գործադիր մարմնի ղեկավարներին ՀՖՖ անդամների հետ խոսելիս հանդես չգալ ՀՖՖ անունից, քանզի անդամներն են կազմում ՀՖՖ բարձրագույն և իրավաստեղծ մարմինը՝ Ժողովը, իսկ դուք միայն ՀՖՖ գործադիր մարմինն եք: Եվ Ժողովն է այն իրավասու մարմինը, ով կարող է անդամների կասեցման կամ հեռացման որոշում կայացնել, այլ ոչ թե դուք: Ուստի խորհուրդ ենք տալիս չխոսել անդամների հետ շանտաժի և պատժամիջոցների լեզվով, այլ անսալ ՀՖՖ անդամ կազմակերպություններին և գործել բացառապես ի շահ հայկական ֆուտբոլի ապագայի:
Լինելով ՀՖՖ անդամ, մենք իրավունք ունենք հանդես գալ հայկական ֆուտբոլը չարիքից մարքելու նախաձեռնությամբ։ Կոչ ենք անում ՀՖՖ ղեկավարներին սթափվել և տեղափոխվել կառուցողական դաշտ, ինչը թույլ կտա միասնական ջանքերով լուծել հայկական ֆուտբոլի առջև ծագած լրջագույն խնդիրները։